Managkapuyo gipatay

CEBU, Philippines — Patay ang managkapuyo nga nagsakay og motorsiklo, sila gipamusil sa wala mailhing mamumuno sa may Zone Ahos, Sitio Pagatpatan sa Barangay Paknaan, Mandaue City, alas -12 sa udto kagahapong adlawa.

Ang gipamatay mao sila si Jessie Montebon, leader sa Homeowners Association sa maong lugar ug ang kapuyo niining si Maribel Tecling. Samtang ang mga mamumuno wala pa mailhi.

Matud pa ni Police Chief Inspector Mercy Villaro, tigpamaba sa Mandaue City Police Office, base sa inisyal nga imbestigasyon pauli na ang duha sakay sa ilang motor sa dihang sila gipamusil sa relocation site sa maong lugar.

Dugang pa ni Villaro, tungod sa naangkong mga samad pinusilan sa kalawasan sa mga biktima maoy naingnan sa hinanali nga kamatayon niini.

Nakuha diha sa crime scene ang mga basiyo sa bala sa kalibre .45 nga armas nga gituohan sa kapolisan maoy gigamit sa pagpusil sa mga biktima.

Sumala pa ni Villaro, tanang anggulo ilang tutukan nga posibleng motibo sa pagpusil patay sa mga biktima.

Apil niini ang personal nga bangi human aduna silay nadawat nga impormasyong adunay nakaaway ang lalaking biktima may kalabutan sa ilang asosasyon sa mga molupyo.

Gawas pa niini, gibutyag ni Villaro nga si Montebon napriso na kaniadto tungod sa kaso niini nga murder. Subayon usab nila kon nalambigit ba sa ilegal nga drugas ang duha.

Samtang si PO3  Jessie James Galo , field investigator sa Presinto 3 sa Mandaue City Police Office (MCPO) mitug-an sa Banat News nga ang duha pulos na bulag sa ilang mga kapikas ug nagtipon na  og puyo sa nahisgotang dapit.

Si PO3 Galo  miingon nga wala matala sa ilang buhatan nga nalambigit si Montebon sa ilegal nga drugas.

Ilaha karong gisubay kining  anggulo nga may kalambigitan sa trabaho ni Montebon sa City Environment and Natural Resources Office (CENRO) ang motibo sa maong pagpatay tungod kay daghan kini nakabingkil nga mga tawo.

Ang ig-agaw ni Montebon nga si Espanyo, 53, nagpuyo sa maong dapit nga nahinabi sa Banat News miingon nga sagad sa naengkuwentro sa biktima mao kadtong namalit og luna sa Pagatpatan nga P20,000 ngadto sa P15,000  ang kantidad ug gipamutol ang mga bakhaw.

Gisumbong kini ni Montebon ngadto sa PENRO  isip magbalantay sa maong dapit. (BANAT NEWS)