Mga kontrabando gipangsunog sa BJMP

CEBU, Philippines — Gipangsunog sa Bureau of Jail Management and Penology-7 ang mga kontrabandong nasakmit gikan sa 36 ka jail facilities sa tibuok rehiyon 7.

Ang direktor sa BJMP-7 nga si Chief Supt. Arnold Buenacosa nagkanayon nga subay kini sa ilang selebrasyon sa ika-27 nga anibersaryo kagahapon.

Ang mga kontrabado nasakmit sa mga kinalit nga greyhound operations sugod Nobiyembre 2017 hangtud Hulyo karong tuiga.

Nakuha ang 327 ka cellphones, 116 ka cellphone accessories, 179 ka sim cards, 55 ka drug paraphernalia, 21 ka sigarilyo, 208 ka improvised weapons, 113 ka dahon sa tabako, ug usa ka fishing string.

Ang mga toxic components sa mga cellphones ang gipangitaan og paagi nga malubong samtang ang mga drugas ang gitugyan ngadto sa Philippine Drug Enforcement Agency aron maoy mo-dispose niini.

Samtang walay drugas ug cellphone nga nasakmit atol sa greyhound operation sa Mandaue City Jail Male Dorm sayo sa buntag kagahapon.

Matud  ni Police Chief Inspector Mercy Villaro, tigpamaba sa Mandaue City Police Office, nga walay mga dinagko nga kontrabando ang nasakmit sa kapolisan kauban sa mga tinugyanan sa BJMP.

Sumala pa ni Villaro nga mga mahait nga butang lang ang ilang nakuha sama sa gunting, ballpen ug lighter.

Gitug-an ni Villaro nga gumikan sa subsob nga greyhound operation nga gipahigayon mas niminus ang mga nasakmit nga kontrabando.

Si Jail Supt. Jessie Calumpang, warden sa MCJ, niingon nga ang maong greyhound operation kabahin sa regular nga “Oplan Linis Piitan” sa BJMP lukop nasud.

Matud ni Calumpang nga iyang gipanghinaut nga malimpiyo na gyud ang MCJ samtang gihigpitan sab ang pagsulod sa mga dalaw.

Ang MCJ adunay 1,934 ka lalaki nga binilanggo ug 180 ka babaye kinsa 80 porsiyento nalambigit sa ilegal nga drugas. (BANAT NEWS)