Medical program himoong online

CEBU, Philippines — Andam si Cebu City Mayor Tomas Osmeña nga makig-alayon sa mga tinun-an sa Cebu Institute of Technology-University nga nagmugna sa online application aron i-improve ang operasyon sa Long Life Medical Assistance Program (LLMAP).

Ang mga estudyante maoy nagmugna sa Aeon application diin matabangan ang siyudad sa pagkuha sa health records sa mga beneficiaries ug pag-digitize sa mga data.

Ang application dunay Global Positioning System (GPS) diin ma-monitor sa siyudad ang paghatud sa mga tambal. Apan kasamtangang dili pa available ang maong application tungod kay i-submit pa kini sa Accenture nga adunay new technologies nga competition.

Si Osmeña niingon nga ang gibuhat sa mga estudyante makatabang sa siyudad aron masulbad ang ginagmay nga problema sa pag-implementar sa programa.

Kini sama sa nasinati ni Konsehal Jocelyn Pesquera human siya nakadawat og report nga adunay mga tambal nga gilabay sa kasagbutan sa Barangay Bonbon.

Tungod niini, nagkanayon si Osmeña nga ang maong application makatabang sa pag-improve sa delivery niini.

Ang mga personnel sa Barangay Mayor’s Office maoy gitahasan sa pag-monitor sa operasyon niini.

Ang LLMAP adunay 800 ka trabahante nga maoy mohatud sa tambal sa hypertension, diabetes ug arthritis ngadto sa 45,000 ka beneficiaries.

Nidugang ang mayor nga andam siya nga i-hire ang mga estudyante kung mahimong malampuson ang maong application. (BANAT NEWS)