Pamilyang durugista sikop sa Talisay

CEBU, Philippines — Usa ka pamilyahan ang nasikop sa kapulisan sa Syudad sa Talisay sa Sitio Magay, Barangay Tanke human ang managtiayon kauban ilang anak ang nakuhaan tagsa-tagsa og daghang pinaketeng gituohang shabu.

Matud pa ni SPO1 Jason Del Campo sa Talisay City Police nga nagpahigayon og patrolya ang iyang mga kaubanan sa nahisgutang lugar dihang ilang nabantayan ang tulo ka tawo nga daw kadudahan kaayo ang mga lihok.

Una nilang gisita si Edelito Maballo, 59, nga wala mahimutang pagkakita nila hinungdan nga ilaha kining girekisa ug nasakpan nga duna kini dalang 20 ka gagmay nga paketeng shabu.

Tungod niini giapil og rekisa ang 19 anyos nilang anak nga si Edwin kinsa nakuhaan og 15 ka gagmay nga paketeng gidudahang shabu ug kalibre .45 nga armas nga adunay lima ka bala.

Ang inahan niini nga si Gina, 45, gidakop usab kay nakuhaan kini og 70 ka gagmay nga paketeng gidudahang shabu  ug drug paraphernalia.

Nagtuo si Del Campo padung pa mamaligya og drugas ang pamilya apan gidemalas kay polis ilang nasugatan sayo sa kaadlawon.  Samtang usa usab ka gidudahang tiggamitan og drugas ang ilang nadakpan sa maong barangay nga giilang si Harvey John Garica, 21, taga Siyudad sa Toledo.

Si PO2 Arthur Abediana sa Talisay City Police nibutyag nga nagpahigayon sila og checkpoint sa dihang nilabay ang suspek nga nagpasayasaya sa gibitbit nga kwarta mao nga ilaha kining gisita ug gihangyo nga ipakita ang sulod sa iyang bulsa.

Apan sa pagkuot niini, giingong dunay natagak nga usa ka paketeng gidudahang shabu ug dalidali kining mikaratil og dagan apan naabtan ug nasakpan usab nga duna kini kalibre .22 nga revolver nga adunay duha ka bala.

Sa Consolacion, nadakpan usab sa buy-bust operation sa miaging gabii sa Sitio Sun-ok,  Barangay Tayud si Fernando  Ybale, 44, nga napalitan og drugas ug nakuhaan og pinaketeng mga gituohang shabu.

Nadakpan usab sa Oplan Limpyo Danao sa Sabado sa buntag diha sa may Cambiohan, Barangay Poblacion, Upland National Road Poblacion, Timobo Cabungahan, ug Panas Sur ang pito nga gidudahang tigpayuhot og drugas.

Ang mga nasikop mao sila si Romy Berden, Timothy Ryan Donaire, Ma. Elena Almaden, Glinde Laurito, Atanacio Batucan, Mervin Monte, ug Jerry Lavador.

Nasakmit gikan sa mga dinakpan ang mga pinutos nga drugas nga motimbang og 12.45 gramos ug P2300 mil nga gituohang halin. (BANAT NEWS)