Sunog sa siyudad nagsunod

CEBU, Philippines — Human sa dakung sunog nga niulbo sa Barangay Kamputhaw, Dakbayan sa Sugbo niadtong Sabado, gisundan kini sa laing sunog sa samang adlaw sa may Barangay Buhisan Proper.

Nadawat sa kabomberohan ang alarma sa maong sunog alas 7:55 sa gabie ug nakontrolar alas 8:17 sa gabii.

Ang sunog nagsugod sa panimalay ni Elena Lazarte.

Matud ni Chief Inspector Noel Nelson Ababon, fire marshall sa Dakbayan sa Sugbo, nga ila pa ipaubos sa imbestigasyon ang hinungdan sa sunog nga niugdaw og tulo ka panimalay nga nagbilin og danyos nga P100, 000.

Dugang ni Ababon nga wala hinooy natala o naangol sa maong sunog sa Buhisan.

Gitug-an ni Ababon nga karong Martes ipatawag nila ang mga saksi atol sa sunog sa Barangay Kamputhaw aron makuhaan og pamahayag aron masuta ang hinungdan.

Samtang ang Division for the Welfare of the Urban Poor sa siyudad mopahigayon og site inspection sa nasunogan sa Purok 3, Kamputhaw.

Ang pangulo sa DWUP, Genevieve Alcoseba, niasoy nga angay nilang bisitahon ang lugar aron masuta kung angay nga ma-reblock.

Ang reblocking importante aron mapalapdan ang hagip-ot nga dalan aron makasulod og dali ang mga responders kung may motumaw nga katalagman.

Apan giklaro ni Alcoseba nga ma-reblock lang nila ang lugar kung gipanag-iya sa siyudad ang luna.

“If city-owned, reblock gyud. If dili we will check with the lot owners,” sumala pa niya.

Niadtong Sabado sa hapon niulbo ang sunog diin 139 ka balay ang naugdaw.

Ang Barangay Kapitan Jessica Cadungong nitug-an nga gamiton nila ang 30 porsyento sa ilang calamity fund aron makapalit og construction materials sa mga apektadong residente.

Ang calamity fund nagkantidad og P384,857.61.

Sa pagsuwat niining balita, si Cadungong niingon nga nagbuhat na sila og resolution aron mahimog legal ang paggamit sa pundo.

Si Lea Japson, pangulo sa Department of Social Welfare and Services (DSWS), niingon nga nanghatag sila og packed meals sa mga apektadong residente.

Siya nidugang nga hangtud sa adlawng Martes ang ilang pagpangapod-apod sa pagkaon.

Nag-validate na karon ang iyang opisina sa listahan sa mga apektado aron sa pag-release sa financial assistance nga nagkantidad og P20,000 matag pamilya.

Ang DSWS mohatag usab og housing materials sama sa 10 ka galvanized iron ug 10 ka plywoods. (BANAT NEWS)