Kapolisan alerto sa Ironman karon

CEBU, Philippines — Higpit nga nagbantay ang kapolisan sa Dakbayan sa Lapu-Lapu sa ipahigayon nga Regent Aguila Energy Drink Ironman 70.3 Philippines Asia-Pacific karong adlawa.

Si Police Senior Superintendent Lemuel Obon, director sa Lapu-Lapu City Police Office (LCPO), niingon nga atol sa dakung kalihukan bantayan sab nila ang mga gidili nga buhaton sa mga manan-away.

Naglakip niini ang pag-selfie sa mga mosaksi samtang mag-atang diha sa rota.

Dugang pa niya nga gipaubos sa heightened alert ang kinatibuk-an pwersa sa LCPO atol sa kalihukan nga magsugod sayo sa kadlawon gikan sa Barangay Punta Engaño sa dakbayan.

Gitataw ni Obon nga ang pagpahigayon og selfie sa mga mosaksi higpit gyud nga gidili diha sa mga dalan nga anha molabay ang mga celebrity bikers nga mosalmot karong tuiga.

Sa niaging Ironman maoy naobserbahan nga ang mga nanan-aw ang maglinya daplin sa dalan ug nag-ilogay sa pagkuha og hulagway ilabi na sa mga celebrity bikers.

Gitataw ni Obon nga sa mga pagdili dili lang ang mga atleta ang ilang gitinguha nga kapanalipdan kun dili lakip na sab ang mga tawo nga magtapok sa kadalanan.

Si Obon niingon nga higpit usab nilang gidili ang pagsaka sa mga manan-aw sa Mandaue-Mactan Bridge.

Likayan sab ang pagdala og mga back packs aron dili mahasol ang kapolisan sa paghimo og security checks niini. (/GMR)(BANATNEWS)