2 ex-convicts gipatay

CEBU, Philippines – Tulo na usab ka mga tawo ang nabiktima sa pagpamusil patay sa duha ka insidente sa Dakbayan sa Sugbo ug ang duha niini mga ex-convicts  nga gipamusil diha sa Mandaue sa miaging gabii.

Sa Mandaue City, patay ang managhigalang pulos ex-convict nga gikan pa miduaw sa haya sa ilang higala dihang silang duha gipamusil sa tulo ka mga tawong riding-in-tandem nga nag-atang sa ilang paggawas gikan sa Cebu International Convention Center (CICC) sa Barangay Guizo, Dakbayan sa Mandaue alas -11 pasado sa miaging gabii.

Si Police Officer 3 David Omambac sa Presinto 1 sa Mandaue City Police Office (MCPO) miila sa mga biktima nga mao sila si Ropi Norvaso ug Ricky Andujar pulos taga Barangay  Binaliw, Dakbayan sa Sugbo. Sa pasiunang imbestigasyon sa kapulisan sa Centro Police Station, gikan namilar ang mga biktima sa haya ni Pascual Villarba Jr., kinsa gipusil patay niadtong Martes.

Matud pa nga pasakay na sila sa motorsiklo ni Norvaso dihang giduol sila og duha ka mga wala mailhing lalaki nga nagsuot og  bonnet ug helmet  ug dayong pusil kang Norvaso kinsa nahagba dayon.

Si Andujar mikaratil pasulod sa CICC Compound ug mikatkat sa paril sa luyo aron makaikyas apan gigukod kini sa ikatulong mamumuno nga nagmotor ug gipusil kini sa makadaghang higayon.

Nakadagan pa og pipila ka metros si Andujar apan nahagba kini pag-abot sa A.S. Fortuna Extension sa maong barangay.

Matud pa ni Police Chief Inspector Aldrin Villacampa, hepe sa Centro Police Station ilaha karong gisusi kung may kalambigitan ba ang kamatayon ni Norvaso ug Andujar ngadto sa pagpatay ni Villarba.

Sumala pa ni Villacampa, si Norvaso, napriso kaniadto tungod sa kasong Reckless Imprudence Resulting to Homicide and Damage to Property, samtang si Andujar napriso na usab sa CPDRC tungod sa ilegal nga drugas ug suspetsado usab kini sa pagpanulis ug pagpatay sa Barangay Pagsabungan niadtong tuig 2012.

Ang ilang gibilaran nga higala nga si Villarba gipatay niadtong Martes kinsa bag-ohay pa usab nakagawas sa Mandaue City Jail tungod sa kasong carnapping.

Gisusi karon sa kapolisan ang personal nga bangi ug kalabutan sa ilegal nga drugas sa duha human ang namatay nilang higala nga si Villarba maoy gitumbok nga tigbaligya og shabu sa mga construction workers diha sa mga construction sites sa North Reclamation area. Samtang patay usab ang usa ka guwardiya nga nagpahuway diha sa bakanteng luna sa Barangay Lahug sa Dakbayan sa Sugbo sayo niadtong Huwebes sa gabii.

Ang biktima giila nga si Wilfredo Saraña, 47, lumad nga taga Mabinay,  Negros Oriental ug usa ka security guard.  Si Senior Police Officer 3 Antonio Din miingon nga ang anak sa biktima mibutyag nga dili pa sila dugay naabot sa maong lugar ug nipahuway dayon ang amahan apan gipusil kini sa wala mailhing tawo.

Wala madestino sa maong lugar ang biktima apan naabot sila sa dapit kay gitanyagan sa kaubang gwardiya nga diha lang una sila mopalabay sa kagabhion samtang nagpaabot og buntag kay molarga sila pauli sa Negros. Apan nakurat na lang ang anak dihang nakadungog kini og buto ug nahagba ang amahan. Wala kini makaklaro sa dagway sa mamumuno gawas lang nga nagsuot kini og puti nga t-shirt. Nagtuo ang anak nga naalaan lang ang iyang amahan kay wala man kini kontra sa lugar. (Rowena D. Capistrano/IBM)(BANAT NEWS)