Osmeña di magdugang og mga bodyguards

CEBU, Philippines — Bisan pa man sa warning nga iyang nadawat niadtong miaging semana nga siya ug si Tejero Barangay Kagawad Jessielou Cadungog nga angay silang magbantay kay sila ang ‘target’ walay plano si Cebu City Mayor Tomas Osmeña nga dugangan ang iyahang seguridad.

Sa official Facebook page ni  Osmeña iyang gi-post didto ang mensahe nga iyang nadawat nga nag-awhag kaniya nga magbantay kay matod pa siya ug ang konsehal maoy target ug angayan nga dugangan ang iyang seguridad.

Wala mabalaka ang mayor ug matud niya kinahanglan niyang motrabaho isip amahan sa siyudad.

“I have to do my job you don’t worry about this things just do your job. I’ll do my job, the people of Cebu voted for me, the protection of the people of Cebu is paramount not mine,” asoy ni Osmeña.

Subli niyang gihulagway nga ang siyudad dili na luwas tungod sa mga kaso sa pagpatay. Dako kining sukwahi sa pangangkon sa kapulisan nga luwas pa gihapon ang Sugbo.

 “It’s my job to inform the people that’s one of the things I can do and I need to ask the people to provide me with information just text me send me a letter or whatever and I’m getting plenty important information,” dugang sa mayor.

Walay plano si Osmeña nga mangayo og tabang sa nasudnong kagamhanan kay gusto niyang si Cebu City Police Office Director Senior Superintendent Royina Garma  ang mosulbad sa problema.

Sa pikas bahin, miuyon na si Gob. Hilario Davide III sa paghulagway sa siyudad nga criminal city na karon. Una niini, si Konsehal Pastor “Jun” Alcover namahayag nga ‘criminal city’ na ang siyudad tungod niining mga pagpatay.

Si Osmeña midason usab sa pamahayag ni Alcover human gibanhigan si Tejero Barangay Kagawad Jessielou Cadungog niadtong adlaw nga Lunes.

Nabantayan sa gobernador nga sugod sa niaging bulan nagsige na ang mga pagpatay ug gusto niyang mohimo og lakang ang kapolisan batok niini.

“It is alarming na gyud, and I hope the police organization here will do something about it,” matud ni Davide.

Matud ni Davide kinahanglan gyud ang police visibility ug kung adunay krimen nga mahitabo kinahanglan paspasan ang imbestigasyon.

Ang gobernador miawhag sa publiko nga di magsalig sa kapolisan sa ilang seguridad sanglit kinahanglang sila mismo magmatngon usab. (Le Phyllis F. Antojado/IBM) (BANAT NEWS)