BRT giaprubahan na sa NEDA
CEBU, Philippines — Magpadala og suwat ang Siyudad sa Sugbo ngadto sa Department of Transportation (DOTr) aron ipadayon ang pagpatuman sa Cebu Bus Rapid Transit project human kini gi-aprobahan pag-usab sa National Economic Development Authority.
Gibutyag ni City Administrator Nigel Paul Villarete nga andam na ang suwat ug pirmahan na lang kini ni Mayor Tomas Osmeña.
Malaumon siya nga mapadala ang suwat sa dili pa makalarga si Osmeña ngadto sa Houston, Texas alang sa iyang minor nga operasyon sa iyang hernia karong Agosto 4. Paghapon sa Biyernes, giaprobahan sa NEDA-Investment Coordination Committee-Cabinet Committee ang P16.3-billion nga BRT sa siyudad bisan og dunay rekomendasyon nga kanselahon kini.
Matud ni Villarete nga daghan pang angay lihukon sama sa pag-hire og Technical Support Consultant, social management consultant ug uban pa alang sa BRT Project.
Gikonsiderar ni Osmeña nga kini ang labing nindot nga birthday gift nga iyang nadawat sa iyang ika-70 nga adlaw’ng natawhan.
“This is long overdue. We are losing millions every month in interest fees because of a failure to implement. Even COA has recommended that charges be filed,” sigon niya.
Gusto sa mayor nga ipang hire sab og balik sa DOTr ang mga trabahante sa BRT Project Implementation Unit aron makaasumir na sab sa pag-implementar sa BRT nga project.
Nagmalaumon si Osmeña nga padayon na gyod ang BRT ug mahuman karong 2021. Ang BRT usa ka sistema diin ang mga bus gahinan og kaugalingong agianan nga mobiya gikan sa Barangay Bulacao hangtod sa Barangay Talamban. (/IBM)(BANATNEWS)
- Latest
