Dul-an 100 ka balay naugdaw

CEBU, Philippines — Dul-an 100 ka mga panimalay ang hingpit nga naugdaw atol sa sunog nga niulbo sa may Sitio Kauswagan ug Sitio Santo Niño, sa Barangay Kinasang-an Pardo niadtong Biyernes sa gabii.

Nadawat sa kabomberohan ang maong alarma alas-9:57 nga niabot ngadto sa task force alpha. Hingpit kining napawong alas 11:47 na sa gabii.

Matud pa ni Cebu City Fire Marshall Chief Inspector Noel Nelson Ababon, ang sunog gituohang nagsugod sa panimalay nga gipanag-iya ni Elviza "Bebie" Flores.

Sumala pa ni Ababon, dili mominos sa usa ka gatos ka mga panimalay nga kadaghanan ginama sa light materials ang naugdaw. Gibanabana nga moabot sa usa ka milyon ang danyos sa maong sunog ug way naangol o nakalas.

Samtang si Konsehal Jun Tumulak, nitug-an nga sa Villa Sacate gym gipahimutang ang mga nasunogan apan ang uban nagpabilin sa ilang tagsa-tagsa ka mga lugar gamit ang tent.

Sa pagka karon gitun-an pa usa sa mga opisyal kung modeklarar ba sila og state of calamity.  Giklaro ni Tumulak ang mga apektado sa sunog naglangkob sa Sitio Kauswagan Basak Pardo ug Sitio Sto.Niño sa Kinasang-an.

Atol sa pag-ulbo sa sunog dali usab nibisita sa Fire Scene si Vice Mayor Edgardo Labella aron pagsusi sa kahimtang sa mga nasunogan diin iyang nakita nga naglisud ang mga bombero tungod sa kahagip-ot sa agianan.

Mokabat sa 135 ka pamilya o 591 indibidwal ang apektado sa maong sunog matud pa ni DSWS Head Lea Japson. Ang naugdaw 69 ka mga panimalay ang nalista nga nasunog as of 5:48 a.m. kagahapon. Matud niya nga motaas o moubos pa ang maong numero tungod aduna pay validation ang DSWS human sa sunog.

Nagsugod na paghatag og libreng packed meals ug disaster kits ang siyudad ngadto sa mga nasunogan nga molanat hangtud tulo ka adlaw.

Si Mayor Tomas Osmeña, sa iyang bahin, miingon nga mohatag og P20,000 nga cash assistance ug housing materials ngadto sa mga apektadong pamilya.

Susihon pa sa Division for the Welfare of the Urban Poor kon kinsay tag-iya sa yuta nga nasunogan.

Sigon ni DWUP Head Meriam Fernandez-Escober nga morekomendar ang DWUP og re-blocking sa lugar kon kinahanglan aron adunay mabutang nga access road kon dunay emergency. (Jean Marvette Demecillo/IBM)(BANATNEWS)