Nabalaka sa mga pagpatay

CEBU, Philippines – Sila si Cebu City Mayor Tomas Osmeña ug Cebu Archbishop Jose Palma nipadayag sa ilang kabalaka nunot niining sagunson nga mga insidente sa pagpatay dinhi sa Sugbo ug ning bag-o, tulo ka tawo ang gituohang biktima sa ‘summary killings’ duha niini manag-uyab.

Si Osmeña miingon dili na gyud luwas ang panahon karon, apan iyang hatagan og panahon ang bag-ong City Director sa Cebu City Police Office nga buhaton ang iyang trabaho.

Giangkon sa mayor nga wala na siya malipay nunot niining mga sunod-sunod nga patay. Ang duha sa mga bag-ohay lang gipamatay mao ang manag-uyab nga taga Tisa, Cebu City nga sila si  Stephen Del Corro ug si Jamie Mata kansang mga lawas napalgan didto sa Barangay San Roque, lungsod sa Liloan niadtong Martes. Ug ang laing usa mao ang 46 anyos nga lalaking gipatay sa barangay Casili, Mandaue City.

Matud ni Osmeña ang mga kriminal karon wala nay kahadlok dili parehas kaniadto dihang buhi pa si SPO1 Adonis Dumpit diin ang mga kriminal dili ganahan magpundo sa siyudad sa Sugbo.

“Fear, you know criminals you cannot stop them by committing a crime by saying please to them, please do not commit a crime it doesn’t work the only language they understand is that we’ll kill you that’s the only language they understand,” asoy sa mayor.

Usa ka Special Investigation Task Group ang giumol aron tutokan ang imbestigasyon sa kamatayon sa manag-uyab.

Matud ni Police Regional Office-7 Director Debold Sinas wala sa listahan sa mga durugista ang duha. Apil sa gisubay nila ang anggulo sa fraternity ug love triangle.

Sa interbyu sa sibyaanang dyLA kang Konsehal Dave Tumulak, deputy mayor for police and public safety kagahapon, kini  miingon nga adunay footage nga nagpakitang gibalik-balikan og karga og duha ka mga lalaking nagmotor ug nagtaptap sa ilang mga nawong ang duha gikan boarding house ni Del Corro.

Gituohang gibalhin ang duha og laing sakyanan ug gidala sa wala hibaw-ing lugar apan patay na dihang napalgan sa Liloan. Matud ni Tumulak wala mokooperar ang mga boardmates ni Del Corro kanila ug gilimpyohan na ang lawak niini sa ilang pag-adto kauban ang mga polis.

Bisan sa pamahayag ni Sinas nga wa sa drug watchlist ang duha, si Tumulak  miingon nga adunay mga estambay nga silingan ni Del Corro sa Mandaue ang nibutyag nga nalambigit kini sa drugas.

Ang mga ginikanan sa manag-uyab nga si Jamie ug Stephen nanawagan karon og hustisya. Ang inahan ni Mata nga si Mercedita wala magdahum nga mao kini ang dangatan. Nakurat na lang siya sa balita nga nangamatay ang duha.

Si Fe, inahan ni Stephen nitug-an nga nagka-chat pa siya sa iyang anak alas 7:50 sa Lunes sa gabii , apan pagka Martes wala na ug dili na sila makontak.

Wala siya masayod kung nalambigit iyang anak sa ilegal nga drugas.

Archbishop Jose Palma sa Archdiocese of Cebu nabalaka na niini halos matag adlaw adunay gipatay.

Sama sa panawagan sa Catholic Bishop Conference of the Philippines bugtong niyang mahimo mao ang pag-ampo, pagpuasa ug pagpenetensiya alang sa mga nakalas, sa mga pamilya niini ug alang usab sa kalinaw para sa nasud. (Camille Pateres ug Rowena Capistrano/IBM)(BANAT NEWS)