25 ka tawo napasakaan og kaso sa DOE
CEBU, Philippines – Niabot ngadto sa 25 ka tawo kinsa giingong namaligya ug nag-distribute og mga butane canister ug binotelya nga gasolina diha sa managlahing lugar sa Probinsiya sa Sugbo ang napasakaan og kaso sa Department of Energy (DOE).
Si Engineer Evander Benjamin Diola, Science Research Specialist sa DOE-7 nibutyag nga tungod sa ilang subsob nga kampaniya ubay-ubay na ang nadakpan ug adunay 25 ka tawo ang napasakaan nila og kaso ug padayon pa ang mga hearing niini.
Gibutyag ni Diola nga dul-an sa 50 mil kilograms na usab ang ilang nasakmit nga butane canister nga naa karon sa ilang butanganan sa Dakbayan sa Naga.
Si Engineer Robert Cardinales, Senior Science Research Specialist sa DOE nagkanayon nga aduna na silay gipaabot karon nga alternative nga gamiton sa butane canister diin luwas kining gamiton sa katawhan ug gahuwat sila sa tulo ka proponents niini nga mopadangat diha sa ilang buhatan.
Ang DOE niawhag sa katawhan nga motawag sa ilang mga hotline numbers 2532150 o 2533459 kong adunay mga nakit-an nga ilegal nga namaligya ug nag-backyard sa pag-refill og butane. (/BDB)(BANAT NEWS)
- Latest
