P70 mil balor sa shabu gisulod sa U-box

CEBU, Philippines — Duha nadakpan sa buy-bust operation sa Pansang, Inayawan, Dakbayan sa Sugbo kagahapon sa kaadlawon samtang laing duha ang gisikop human nakuhai og ilegal nga drugas atol sa checkpoint sa Natalio Bacalso Avenue, Poblacion Pardo niadtong Sabado sa gabii.

Ang tigpamaba sa Cebu City Police Office, Senior Insp. Arieza Otida, niila sa mga nadakpan nga sila si Gilbert Fuentes ug Liberato Fuentes kinsa nakuhaan og walo ka triangular sachet ug usa ka medium nga pakete sa gituohang shabu ingon man P600 nga gituohang halin sa pagpamaligya og shabu.

Gibanabana nga balor og P60 mil ang mga shabu nga nasakmit. Samtang sa checkpoint, nadakpan sila si Rhedford Realda, 29, usa ka construction worker kinsa residente sa Cadulawan, Lungsod sa Minglanilla ug Edgar Bariga, 37, construction worker nga lumad nga taga Canlaon City, Negros Oriental.

Sakay sa usa ka motorsiklo ang duha ug gipara gumikan kay wala mag-helmet.

Dihang giablihan ni Realda ang U-box sa motorsiklo aron kuhaon ang driver’s license nga gisulod sa pitaka, napalgan sa usa sa mga polis ang napulo ka pakete sa gituohang shabu.

Dihang gikapkapan ang angkas ni Realda nga si Bariga, nakuhaan sab kini og laing 38 ka triangular nga pakete sa gidudahang shabu.

Mobalor sa P70 mil ang mga nakuhang shabu gikan sa duha ka dinakpan.

Sa laing bahin nasikop ang giilang pusher og shabu sa Sta. Cruz, Poblacion, Lungsod sa Medellin.

Si Senior Inspector Narciso Abapo, hepe sa kapolisan sa lungsod, niila sa dinakpan nga si Eduardo Jumao-as, 47, lumad nga taga Ward  4, Lungsod sa Minglanilla.

Nasakmit gikan sa dinakpan ang tulo ka gagmay nga pakete sa shabu dihang gipahigayon ang buy-bust operation. Laing  gidakop pinasikad sa warrant of arrest mao si Johnriel Joromo, 24, nagpuyo sab sa maong dapit.

Si Senior Inspector Romeo Caacoy, hepe sa kapolisan sa Lungsod sa Catmon, niingon nga ang suspek may kaso sa kalapasan sa Republic Act 9262 o Violence Against Women and Children. (BANAT NEWS)