Pagdili sa sikad sa SRP gisugdan na sa Talisay

CEBU, Philippines — Gisugdan na ang pagdili sa mga traysikad nga makalabang-labang sa South Road Properties (SRP) sa niaging adlaw.

Aduna’y nagyawyaw samtang may nakauyon sa gipatuman sa Barangay San Roque nga pinangulohan ni Kapitan Jun Cabrera, City of Talisay-Traffic Operation Development Authority (CT-TODA), Disaster Risk Reduction and Management Office ug ni Joy Tumalak, focal person sa traffic management sa Kapitolyo.

Si Tumulak niingon nga gipasabot nila ang mga drayber sa traysikad tungod kay ila ra man sab kining kaluwasan ang ilang gibuhat.

Mahimo nga makapanginabuhi sila diha lang sa barangay road o interior nga bahin nga minus ang maghaguros nga sakyanan.

Samtang si Bise Mayor Alan Bucao dakung uyon sa ilang gibuhat kay mao sab kini ang anaa sa ordinansa sa siyudad nga dugay na nga giaprubahan apan wala matarung sa pag-implementar.

“Uyon kaayo ko nga dili sad putlan sa panginabuhian kun di pagpatuman lang sa disiplina,” matud ni Bucao.

Si Tumulak nitataw nga ila na sab nga gisugdan ang pakigtapok sa mga opisyal sa Barangay San Isidro, Tabunok, Lawaan 1 ug uban pa aron mao sab kini ang mosunod sa pagpatuman niini aron adunay kahusayan sa kadalanan.

Sa nasayran nga yano lang nga maglabang-labang ang mga traysikad sa SRP nga nakadelikado kanila ingon man sa ilang pasahero.

Gani ang uban mosubay gyud sa SRP apan kun sila badlungon sa ubang motorista mao pa kini ang masuko o maglagot sa nagbadlong kanila. (BANAT NEWS)