Bag-ong traffic code gibasura ni Tomas

CEBU, Philippines — Gi-veto ni Cebu City Mayor Tomas Osmeña ang ordinansahon alang sa consolidated traffic code sa siyudad nga giduso ni Konsehal Joel Garganera.

“In view of the confusion created in the legislative enactment, as well as its implementation and enforcement, this ordinance is prejudicial to public welfare," matud sa mayor.

Matud sa mayor nga dunay laing traffic related ordinances nga dili tukma sa consolidated traffic code dungan sa pagbutyag nga duna say ubang provisions ang matud pa redundant na.

Sumala pa sa mayor nga si Garganera wala nag-alphabetized sa definition sa words ug phrases nga mas naghatag og kalibog sa katawhan nga mobasa sa balaudnon.

Si Garganera sa iyang bahin niingon nga nihimo sila sa consolidation sa tanang traffic ordinances sa siyudad sanglit dunay 60 ka subsequent ordinances sukad ang City Ordinance 801 kun ang Traffic Code sa siyudad napahimutang.

“Og unsay sitwasyon sa atong traffic karon sa Cebu City, mao sad na ka chaotic ang atong traffic ordinance. I challenge you if you try to get a copy of our traffic ordinance 1973 up to now there are more 60 amendatory ordinances ingon ana sad ka chaotic," matud ni Garganera.

Giangkon ni Garganera nga ang oposisyon dili maka-override sa veto sa mayor tungod kay magkinahanglan kini og two-thirds vote ug wala silay igong numero.

Hinoon kini nitataw nga gikinahanglan sa siyudad nga i-consolidate ang tanang traffic laws aron sayon na lang sa mga residente sa siyudad pagtuon sa maong mga ordinansa.

Kini nidugang nga ang issue sa alphabetizing sa words ug phrases sa ordinansa dili kinahanglan tungod kay sayon kini sabton isip reference sa Traffic Code, ang mother ordinance.

Nagkanayon si Garganera nga walay redundancy sa iyang ordinansahon.

Giangkon sa Konsehal nga dunay laing traffic related ordinances nga wala na-incorporate sa maong measure tungod kay nakatutok lang siya sa amendatory ordinances sa City Traffic Code 801.

Apan kini nitataw nga ang maong enactment sa consolidated ordinance mahimong dalan alang sa incorporation sa ubang traffic related ordinances sa siyudad.

Asoy sa konsehal nga ang maong consolidation sa traffic ordinances dili makatubag sa problema sa trapiko sa siyudad karon ug naghimo lang siya sa iyang trabaho isip legislator aron pagseguro nga ang traffic laws sayon ra ma-access ug masabtan. (/GMR)(BANATNEWS)