CPDRC may bugas na sa NFA
CEBU, Philippines — Nakasugod na pagdawat og balik ang Kapitolyo og bugas gikan sa National Food Authority diin unang nakapahimulos ang mga piniriso sa Cebu Provincial Detention and Rehabilitation Center (CPDRC).
Kini human sa pipila ka buwan nga pagnihit sa bugas sa NFA sa sayong bahin karong tuiga.
Matud ni Jone Siegfred Sepe, pangulo sa Provincial General Services Office, nga niadtong Martes nakakuha na og unang 180 ka sako sa bugas sa NFA ug gidala sa CPDRC.
Ang CPDRC naggahin og P1.5 milyones alang supply sa bugas sa mga piniriso diin moabot sa 937 ka sako ang gipaabot nga makuha sa probinsiya sa NFA.
Matud ni Sepe nga matag sako sa NFA rice nagkantidad og P1,600 diin mas nimahal kini itandi sa P1,500 sa kaniadto nga presyo.
Gibanabana nga moabot sa 93 ka sako sa bugas matag adlaw ang mahurot sa dul-an 4,000 ka piniriso sa CPDRC.
Matud ni Sepe nga kun padayon nga modawat og piniriso ang provincial jail, mas motaas ang makonsumo niini nga bugas.
Hinoon matud ni Sepe nga mahimo ra makakuha og balik ang CPDRC sa NFA kun mahutdan.
Bisan ang ubang buhatan sa Kapitolyo mahimo ra nga makapalit sa NFA alang sa mga programa niini sama sa Halad ni Lolo ug Lola sa buhatan ni Bise Gobernador Agnes Magpale ingon man ang Provincial Social Welfare and Development Office. (/GMR)(BANATNEWS)
- Latest