Mga kapitan gihinabi ni Garma nikooperar
CEBU, Philippines — Nisaad ang napulo ka kapitan sa Dakbayan sa Sugbo nga apektado sa drugas ngadto kang Cebu City Police Office Director Royina Garma nga mopasar og mga ordinansa aron adunay ngipon ang pagsita sa kapolisan.
Kini human sa pagpakighinabi ni Garma sa napulo ka kapitan sa niaging semana.
Matud ni Garma nga ang maong ordinansa ang basehan sa ilang pagpanakop sa mga barangay sama sa pag-regulate sa mga piso net, video games, mga kan-anan matag gabii ug uban pa nga maoy makapaaghat sa mga residente nga magtambay sa gawas sa dili na oras sa gabii.
Buot sab ni Garma nga gub-on sa mga opisyal sa barangay ang mga abandonadong barong-barong nga maoy tambayan ug abotanan sa mga durugista ug i-monitor kung asa ang mga balay nga walay mga bintana nga posibleng gihimo nga suyopanan.
Usa pa, kadtong mga balay nga adunay mga sekretong pultahan nga maoy daganan sa mga suspek panahon sa raid sa kapolisan.
Gipadayag ni Garma nga nalipay siya sa gipakitang partisipasyon sa mga kapitan atol sa gilusad nga hiniusang One Time Big Time niadtong Miyerkules diin wala naglisud ang mga polis og panawag sa mga opisyal atol sa operasyon.
Iyang gitataw nga ang ilang papel kutob ra sa pagdakop sa mga suspek ug dili sila pa ang motabang sa mga mabiyaang pamilya.
“Diha na mosulod ang role sa barangay nga moabag sa pamilya aron mabuhi gawas sa drugas,” si Garma nagkanayon. (/GMR)(BANATNEWS)
- Latest