Mga opisyal patrabahoon way bagulbol

CEBU, Philippines —  Gipahimangnuan sa direktor sa Department of Interior and Local Government (DILG) sa Dakbayan sa Talisay ang tanang opisyal sa barangay nga dili magmika sa ilang obligasyon sa mga konstituwente.

Si Celerino Magto Jr. nagkanayon nga masaligon siya sa liderato sa bag-ong napili nga presidente sa Association of Barangay Councils (ABC) nga si Kapitan Marietta Bucao sa San Isidro apan mas maayo gihapon nga sila pahinumduman.

Matud ni Magto nga ang kampanya ni Presidente Rodrigo Duterte batok sa ilegal nga drugas mao gihapon ang nag-una sa ilang programa lakip na ngadto sa kabarangayan.

Nahibaw-an nga daghan sa mga opisyal sa barangay ang nagbagulbol tungod sa nagkadaghan nga papeles nga isumiter nila sa DILG diin maglibog na sila kun aduna pa ba silay oras sa ubang trabahoon sa barangay.

Apan si Magto niingon nga walay rason nga magbagulbol ang mga opisyal tungod kay wala sila pugsa sa pagpapili sa ilang posisyon karon.

Gani nanumpa man sila nga motuman sa ilang obligasyon ngadto sa katawhan alang sa pagserbisyo.

“Normal na kay evolving man ang governance, so magkadaghan gyud ang atong requirements nga ipasumiter nila,” matud ni Magto.

Si Magto niingon nga kinahanglan nga dili magtinapolan ang mga opisyal kun dili molihok na aron dili makasugat og kaso. GMR (BANATNEWS)