Sundalo gipusil, armas nikagar

CEBU, Philippines —  Prisohan ang nadangatan sa duha ka lalaki human nisuway sa pagpusil sa mga sakop sa mga sundalo nga nisita kanila atol sa checkpoint sa Linao, Lungsod sa Minglanilla niadtong Lunes sa hapon.

Ang mga dinakpan mao sila si Harold Bryan Burgos, 25, ulitawo nga taga Simala, Lungsod sa Sibonga ug si Junrey Cuetera, 26, taga Barangay Gutlang, Lungsod sa Argao.

Si SPO1 Junyl Ater sa Minglanilla Police Station nibutyag nga nagpahigayon og checkpoint ang mga sakop sa Land Transportation Office (LTO) uban sa 32nd DRC Team sa Philippine Army ug kapolisan sa maong lungsod.

Ilang nasita ang mga suspek nga nag-angkas sa motor nga aduna’y plakang GD-16268.

Sa dihang gipangitaan sila sa ilang dokumento sa motor, wala kini nakapakita hinungdan nga ang duha nanglingkod lang una sa daplin.

Si Butch Sebastian sa LTO-Manila nimando sa duha nga mobarug apan ang duha nikaratil sa pagdagan apan dali ra sila nga gibabagan ni PFC Rhelwel Liacao ug ni Sgt. Rey Bolido.

Si Burgos nibunot sa iyang .45 nga pistola dayun pusil ngadto sa mga sundalo.

Maayo na lang nga wala kini nakabuto hangtud nga silang duha nasikop.

Nakuhaan sab si Cuetera og lima ka bala sa .45 nga armas dihang girekisa.

Matud ni Ater nga pangdepensa lang daw sa duha ka suspek ang armas samtang sila mopalit og ginadiling drugas sa Dakbayan sa Talisay. Ang duha pulos gitanggong sa bilanggoan ug gipasakaan og kaso. Sa laing bahin, duha ka motorista ang nadakpan sa checkpoint sa kapolisan sa Presinto 2 sa Mandaue City Police Office (MCPO) sa may dalan Zuelleg, Subangdaku alas 8 pasado sa niaging Lunes sa gabii.

Si Senior Police Officer 2 Michael Limalima niila sa duha nga ilang nadakpan nga sila si Rey Torribel, 28, ug Eduard Manatad, 26, pulos taga Sector 3, Barangay Pagsabungan sa maong dakbayan.

Matud ni Limalima nga gikan sa Dakbayan sa Sugbo ang duha  nga nagsakay sa ilang motorsiklo apan sa ilang paglabay sa checkpoint dihang girekisa maoy nakuha ang duha ka gagmay nga pakete sa shabu ug tinfoil nga gamiton sa pagsuyop niini. Samtang wala sab makaugpo ang duha ka sugarol og hantak sa Saac, Buaya, Dakbayan sa Lapu-Lapu dihang gironda kini sa kapolisan alas 6 pasado sa niaging gabii.

Si PO2 Jade Queruben ug PO1 Joenel Dizon sa Presinto 5 sa Lapu-Lapu City Police Office (LLCPO) nga nahiagi sa nagtapok nga mga sugarol og hantak maoy kalit nga nironda niini.

Nabungkag ang panagtapok sa mga sugarol dihang naglumba og panagan pahilayo apan ang duha nga sila si Ruben Casinilio, 39, ug Rolando Casinilio, 53, nga nakalitan ang wala dayon makalihok sa pagdagan hinungdan sa ilang pagkasikop.

Nasakmit gikan kanila ang tulo ka sinsiyo nga gihimo nilang antugon ingon man ang pipila ka sinsiyo nga ilang pusta sa maong sugal. GMR (BANATNEWS)