Garma ngadto sa mga polis: Pag-behave mo
CEBU, Philippines — Gibaharan sa direktor sa Cebu City Police Office Senior Supt. Royina Garma nga dili sila magduha-duha nga silotan ang mga polis nga masakpang manugal bisan pa man og hapit na kini moretiro sa serbisyo.
Kini human si SPO1 Felipe Alfeche gikatakda diay’ng moretiro sulod na lang sa tulo ka buwan ug tungod sa nahitabo hayan malangkatan kini sa iyang benepisyo.
"They're warned already by the RD, they know na bawal. Mag-behave ka talaga. Sorry siya," si Garma nagkanayon atol sa ambush interview kagahapon.
Si Alfeche, nadestino sa CCPO- Personnel Holding and Account Unit ug si PO2 Jansen Caña, sa CCPO Police Station 2 girelibohan ug giimbestigar human sila nakuhaan og hulagway sa red team ni Police Regional Office-7 Regional Director Debold Sinas sa tigbakayan sa Dakbayan sa Naga ug Dalan A. Lopez, Dakbayan sa Sugbo niadtong Hunyo 24 ug 30.
Dugay nang gidili sa mga polis ang manugal apan daghang mga polis ang nagmagahi ug ang uban mao pay magpa tigbakay sa mga pista sa mga sitio sa kabarangayan. Niadtong Enero 25, karong tuiga gipasakaan og kaso ang polis sa CCPO Police Station 1 nga si Police Officer 2 Cyrelle Marie Bayate, 30 human masakping nagduwa sa casino.
Matud ni Garma nga parte kini sa internal cleansing diin anamon og tangtang sa serbisyo ang mga abusadong mga polis kay daghang aplikanteng nagpaabot mopuli nila.
Sa laing bahin, nakighinabi si Garma sa mga kapitan sa napulo ka mga barangay nga gideklarar sa Philippine Drug Enforcement Agency-7 nga mga seriously affected barangay sa illegal nga drugas nga mao ang Ermita, Suba, Pasil ug mga silingang barangay niini. IBM (BANATNEWS)
- Latest
