Napatay diha sa Archbishop Palace duawon ni Palma

CEBU, Philippines —  Bisan pa man sa nahitabo, tinguha ni Cebu Archbishop Jose Palma nga mobisita sa haya ni Jeffrey Cañedo, ang lalaki nga napusilan patay sa mga polis diha sa sulod sa Archbishop Palace Compound samtang nangita kaniya kay magpatambag Hulyo 10 sa buntag.

Matud pa sa Arsobispo, mobisita siya sa haya ni Cañedo sa dili pa kini ilubong karong Hulyo 20 ug dili siya motugot nga dunay polis nga mokuyog kaniya sa iyang buhaton.

Tungod sa nahitabo, adunay mga polis nga gidestino diha sa Archbishop Palace aron sa pagbantay human nga nisulod si Cañedo sa lugar nga armado ug giingong nagmagahi pagpatuo sa mga polis nga miresponde ug misuway           hinuon og pusil kanila hinungdan nga kini napatay.

Sa pikas bahin, gitan-aw ni Palma kung unsay ilang matabang ngadto sa pamilya sa batang si Bladen Skyler Abatayo,4, nga napagan sa anti-illegal drugs operations sa mga sakop sa Carbon Police Station diha sa lugar nga gipuy-an sa bata.

Si Palma nasubo kay naapil sa collateral damage sa pakigbatok kontra illegal nga drugas ang usa ka inosente nga bata. IBM (BANATNEWS)