SK councilor positibo sa drugas

CEBU, Philippines —  Usa ka konsehal sa Sangguniang Kabataan (SK) sa barangay Cambanay Dakbayan sa Danao ang nagpositibo sa gipahigayon nga drug test sa Cebu Provincial Anti-drug Abuse Office (CPADAO).

Ang maong opisyal apil kini sa 55 ka mga opisyal sa barangay sa Cambanay nga gi-screen sa CPADAO niadtong Hulyo 8.

Matud sa pangulo sa CPADAO Ivy Durano Meca ipaagi pa sa confirmatory test ang resulta ug gipaabot mogawas ang resulta usa ngadto sa duha ka semana.

Gawas sa maong opisyal aduna usab job order nga empleyado sa Dakbayan sa Naga ang nagpositibo sa drug test niadtong Hulyo 16. Dunay 65 ka empleyado sa city hall ug 21 ka mga personnel sa Bureau of Jail Management and Penology ang gipaubos sa screening.

Ang CPADAO ni drug test usab sa 171 ka mga opisyal sa SK ug barangay sa Dumanjug, 139 ka mga empleyado sa Cordova apil na ang mga polis ug bombero ug tanan niini ang nagnegatibo ang resulta.

Matud ni Meca nga kon magpositibo sa confirmatory test ang SK, ilang isumiter ngadto sa Department of Interior and Local Government (DILG) ang resulta aron sa mahimong aksyon.

Matod ni Meca nga sa balaod ang mga opisyal sa gobiyerno nga magpositibo sa drug test, tan-awon ang gigrabehon sa adiksyon niini sa ilegal nga drugas pinaagi sa Department of Health.

Kon “low risk” lang, ipaubos sila sa outpatient program  apan kon “high risk” kinahanglan in-house rehabilitation .

Kinahanglan usab nga boluntaryo silang mopaubos sa rehabilitasyon aron dili makasohan og administratiba.

Gitinguha sa CPADAO nga adunay ordinansa nga ma-institutionalize ang community based treatment and rehabilitation program sa tibuok probinsya sa Sugbo.

Pinaagi niini aduna nay standard nga rehabilitasyon sa mga nitahan nga drug suspects. IBM (BANATNEWS)