Mga armas nakalusot kay lugak ang seguridad sa CSBT
CEBU, Philippines — Sakay ang usa ka motor pasulod sa Cebu South Bus Terminal (CSBT), nakalusot ang mga gun smugglers nga nasakpan gihapon didto sa pantalan sa Samboan dala ang dul-an 50 ka armas nga ilaha untang dad-on ngadto sa Dipolog City sa Mindanao.
Matud ni Joey Herrera ang manager sa CSBT nga base sa ilang nakita sa CCTV ang mga suspetsado nisulod sa terminal nga nagsakay og motor.
Ang mga suspetsado giila nga sila si Evelino Cubol, 36, iyang asawa nga si Floramae, 37, ug Maria Bella Manit, 54, pulos residente sa Barangay Suba, Siyudad sa Danao.
Nagduda si Herrera nga dugay na nga giplano sa mga suspetsado nga makalusot ang dala nga armas.
"Nagmotor, pagsulod nila, nag-standby sila kadiyot diha sa terminal pagkahuman ang babaye nibalik og gawas sa terminal nagdala og motor, karon nahibulong mi nga nabalik dayon ang babaye nga nagmotor," matud ni Herrera. Nasuta nila nga ang motor nga gigamit, gi-park sa atbang nga convenience store sukad pa niadtong Sabado.
Ang tulo nadakpan niadtong Sabado sa hapon didto sa pantalan sa Barangay San Sebastian sa Lungsod sa Samboan samtang padung na unta mosakay og barko padulong sa Dipolog City.
Si Herrera niangkon nga lugak kaayo ang seguridad hilabina ang pagsulod sa mga pribadong sakyanan ug taxi sa terminal ug karon ilaha na kining estriktuhon. IBM (BANATNEWS)
- Latest
