Polis sa kadalanan gidayeg

CEBU, Philippines — Tinguha ni Cebu City Mayor Tomas Osmeña nga magpadayon ang pagpakatap sa kapolisan sa kadalanan sa siyudad ilabi na karon nga niani kini og mga positibong komento gikan sa publiko.

Daghan nga mga Sugbuanon ang nakabantay ug nakadayeg nga duna gyuy mga polis nga makita sa kadalanan sa siyudad ug gipanghinaut sa mayor nga magpadayon.

“That’s the deployment strategy, that’s a positive change that I see and hopefully that will work,” sigun ni Osmeña.

Ang director sa Cebu City Police Office (CCPO), Senior Supt. Royina Garma, niasoy nga dunay psychological impact sa katawhan kun makita nila ang presensiya sa kapolisan.

Nagkahinabi sila ni Konsehal Dave Tumulak, chairman sa committee on public order and safety ug kini nihangyo nga kun pwede pa sila matabangan sa siyudad sa dugang 20 ka outposts nga ilang gikinahanglan aron dali ra makita sa katawhan ang mga pulis ilabi na sa mga dapit nga daghan og tawo.

“Iba kasi pag-naglalakad sa kalsada hindi mo makikita while pag may box elevated siya nakikita yung polis at the same time nakikita nung pulis yung paligid niya,” sigun ni Garma.

Gawas sa outposts nisugyot sab kini nga mopasar ang siyudad og implementing rules sa mga ordinansa aron duna gyuy ngipon ang pagpatuman niini.

Kini sama sa curfew ordinance, anti-smoking ug uban pang ordinansa nga makaapektar sa kahapsay ug kalinaw sa siyudad.

Samtang nagpasalamat si Garma sa suporta ingon man pagdayeg ni Osmeña sa paningkamot nga ilang gihimo. (BANAT NEWS)