P8-M danyos sa sunog sa warehouse

CEBU, Philippines — Gibanabana nga P8 milyones ang danyos sa sunog nga niulbo niadtong Domingo sa gabii sa Barangay South Poblacion, Dakbayan sa Naga.

Ang nasunog mao ang Asian Grain Corporation diin adunay mga trabahante nga nagpuyo.

Nadawat sa kabomberohan ang alarma alas 6:31 sa gabii ug giisa kini sa general alarm alas 7:44 ug under control alas 9:26 na apan hingpit nga na-fire out alas 11:35 na sa gabii.

Matud ni Fire Officer 2 Rey Herediano nga ang guwardiya sa Asian Grains Corporation nga si Ariel Catipay maoy nitaho sa sunog nga nagsugod sa stockroom hinungdan dali kining girespondehan apan pag-abot sa mga bombero nakadaku na ang kayo.

Base sa inisyal nga imbestigasyon nga ang ni-overheat nga air condition sa stockroom maoy hinungdan sa pagkuyanap sa kayo sa tibuok warehouse.

Sa wala pa ang sunog sa Dakbayan sa Naga, usa sab ka sunog ang niulbo sa may Sitio Mabuhay, Barangay Luz, Dakbayan sa Sugbo. Usa ka residential house nga iya ni Vicenta Rublica ang apektado niini diin gibanabana nga moabot sa P2 mil ang danyos.

Wala hinooy naangol sa maong sunog nga niulbo sa duha ka managlahi nga lugar. (BANAT NEWS)