Labella nagtuo Zafra di motapon sa pikas grupo

CEBU, Philippines — Ang dakung opisyal sa Barug Team Rama-PDP-Laban, Cebu City Vice Mayor Edgardo Labella, wala’y pagduda kang incumbent Association of Barangay Councils president ug Tisa Barangay Kapitan Phillip Zafra nga   mobalhin kini og laing grupo.

Nitumaw ang pamahayag human sa pagdeklarar ni Zafra sa iyang pagka-independente na niadtong niaging semana.

Si Zafra nahimong kaalyado sa Barug Team Rama-PDP-Laban sa pila na ka tuig ug gani napili kini isip ABC president human gisuportahan sa grupo niadtong 2013.

Giangkon ni Labella nga gipahibawo siya ni Zafra labot sa maong hisgutanan nga maoy rason nga iyang girespetaran ang desisyon niini.

Matud ni Labella nga dili importante ang party affiliation kaniya tungod kay ang labing importante mao ang pagserbisyo sa publiko isip piniling opisyal. Si Zafra nilingkod isip ex-officio member sa konseho sa siyudad ug tungod kay independente naman kini, 8-9 na ang standing sa mga sakop sa konseho diin ang Bando Osmeña Pundok Kauswagan (BOPK) na ang mayoriya.

Ang mga konsehal sa BOPK mao sila si Margarita Osmeña, Sisinio Andales, Joy Augustus Young, Jerry Guardo, Eugenio Gabuya Jr., Alvin Arcilla, Dave Tumulak, Mary Ann delos Santos ug Sangguniang Kabataan Federation president Jessica Resch. Sa Barug Team Rama-PDP-Laban mao sila si Jocelyn Pesquera, Eduardo Rama Jr., Pastor Alcover Jr., Jose Daluz III, Raymond Alvin Garcia, Renato Osmeña Jr., Joel Garganera ug ang bag-ong natudlo nga si Erik Miguel Espina.

Dihang gideklarar ni Zafra ang iyang pagka-independente, gipahibawo sab niya nga dili na siya modagan sa pagka-presidente sa ABC tungod kay mas motutok na siya sa iyang barangay. (BANAT NEWS)