Polis nasakpang nanigbakay
CEBU, Philippines — Duha ka mga off -duty nga polis nasakpang nanugal sa managlahing tigbakayan sa Dakbayan sa Naga ug sa dalan A. Lopez,Dakbayan sa Sugbo niadtong Hunyo 24 ug 30.
Ipaubos sa imbestigasyon sila si SPO1 Felipe Alfeche, nadestino sa Cebu City Police Office- Personnel Holding and Account Unit ug si PO2 Jansen Caña, sa CCPO Police Station 2 human sila nakuhaan og hulagway sa red team ni Police Regional Office-7 Regional Director Debold Sinas diha sa tigbakayan.
Ang red team mao ang sinaligang mata ug dunggan ni Sinas nga mobantay sa mga polis sa PRO-7 ug giingong magronda kini sa mga pasugalan ug bisan pa man sa golf course.
“Bawal manugal ang polis bisag wala pa na naka-uniform ug bisag off- duty pa na,” pamahayag sa maong heneral sa press conference kagahapong adlawa. Butyag ni Sinas nga niadtong Hunyo 23, nakadawat ang iyang red team og impormasyon nga manugal si Caña didto sa tigbakayan sa A. Lopez pagkasunod adlaw hinungdan nga ilaha kining gibantayan hangtud nasakpan ug nakuhaan og hulagway isip ebidensya.
Sumala pa sa hepe sa CCPO Police Station 2 nga si Police Chief Insp. Maria Theresa Macatangay nga gipasidan-an na niyang daan ang iyang mga polis bahin niini.
Susama sab kini sa nahitabo kang Alfeche, nakadawat sab og impormasyon ang red team nga pirme kining makit-an sa tigbakayan hinungdan nga ilaha kining gibantayan ug nakuhaan og hulagway niadtong Hunyo 30.
Si Sinas miingon nga posibleng mataktak sa serbisyo ang duha sanglit dakong kalapasan kini sa ilang ethics. Ipatawag usab ni Sinas ang mga hepe diin gipahigayon ang maong tigbakay tungod kay illegal nga sugal kini. (BANAT NEWS)
- Latest
