Usa ka pamilya sikop sa buy-bust

CEBU, Philippines — Nasikop ang walo ka tawo lakip ang usa ka pamilya sa pagpamaligya og ilegal nga drugas atol sa Oplan Limpyo Lacion, One Time Big Time sa Sitio East Binabag, Tayud, Consolacion sa duha ka managlahi nga buy-bust operations.

Ang nasikop mao ang managpamilya nga sila si Saturnino Zamora alyas Bungot, usa ka street level target ug subject sa operasyon, ug iyang kapuyo nga si Luzviminda Zamora, 54, ug mga anak nga sila si Mark Anthony, 24; Bryan, 18, ug Gerard, 18, pulos mga ulitawo.

Lakip sa nasikop sa lahi nga operasyon mao sila si Niño Trangia, 18; Lylray Abelo, 27, ug Joefil Pitogo, 25-anyos.

Ang mga dinakpan nasakmitan og mga pinutos nga shabu nga balor og dul-an sa P73 mil.

Giandam na sa kapolisan ang tukmang kaso batok sa mga dinakpan kinsa kasamtangan karon nga nagtingkagol sa prisohan.

Si Police Officer 3 Adrian Cagalitan niingon nga unang nadakpan ang amahan nga ni Saturnino sa mga sakop sa Municipal Drug Enforcement Unit (MDEU) ug nakuha gikan niini ang usa ka gamay nga pakete sa shabu.

Ang asawa nga si Luzviminda ang nahidangat sab alang unta sa pagluwas kang Saturnino hinungdan nga lakip kini sa gidakop ug nakuhaan og shabu nga gidala niini.

Ang tulo ka anak nagtinguha usab unta sa pagluwas sa mga ginikanan hinungdan nga silang tulo ang lakip sa gipangdakop. Gawas sa kasong paghupot og ilegal nga drugas, ang tulo ka anak ang pasakaan usab og kasong obstruction of justice.

Samtang sa Sitio Camolinas, Poblacion, Cordova nadakpan sa buy-bust operation sila si Andres Inoc, 51, ug Rochel Casquejo, 21, kinsa nasakmitan og 21 ka gagmay nga pakete sa shabu ug P300 nga buy-bust money.

Ang mga dinakpan nalakip sa watchlist nga mga drug personalities sa  kapolisan.  Sa pikas bahin, duha ka lalaki ang nasikop sa Purok 4, Jaclupan, Dakbayan sa Talisay niadtong Sabado sa hapon.

Si PO3 Arthur Santillan sa Talisay City Police Station nibutyag nga gihimo nila ang buy-bust operation isip tubag sa impormasyon nga gihatag kanila.

Matud niya nga gisugat dayon sila sa mamarukay nga nailhan nga si Brix Racal alyas Soroy, 18, nagpuyo sa maong dapit, kinsa nakuhaan og 10 ka gagmay nga pakete sa shabu nga balor og P5 mil.

Nilahos ang mga operatiba sa ilang target nga si Vanroy Abastas, 31, kinsa dali ra nikagat hinungdan sa iyang pagkasikop ug nakuhaan og 34 ka gagmay nga pakete ug duha ka medium nga pakete sa shabu nga balor og P82,500. (BANAT NEWS)