Manag-uyab gitulis

CEBU, Philippines — Manag-uyab nga sakay sa traysikad ang gitulis sa wala ilhing lalaki nga nagsakay og motorsiklo sa Barangay San Isidro, Dakbayan sa Talisay niadtong Miyerkules sa gabii.

Ang biktima usa ka menor de edad ug 19-anyos nga babaye nga taga Sitio Pang-Pang, San Isidro, kinsa padulong na unta mamauli dihang kalit gibabagan sa motor.

Matud pa nga gihapak sa pul-an sa armas ang lalaki dayon bira sa bag niini.

Giapil sab sa pagkuha ang duha ka Samsung nga cellphones, usa ka iPhone nga balor og P38 mil ug pitaka nga aduna’y sulod nga P1,670.

Wala pa natagbaw gipatiran pa gyud ang babaye dayon tion sa armas sa nagmaneho sa traysikad ug yano lang nga nisibat ang tulisan.

Sa laing bahin, tulisan nga nihapit og suyop ang nasikop sa kapolisan sa Dakbayan sa Talisay sa Barangay Tangke kagahapon sa   kaadlawon.

Ang dinakpan mao si Romvic Hermoso, 43, taga Barangay Cansojong sa maong siyudad, kinsa gisita sa checkpoint samtang nagmaneho og motorsiklo nga walay lisensya hinungdan nga nakit-an ang nagbagal sa hawak nga .22 magnum revolver nga adunay duha ka bala.

Nakuhaan sab og duha ka gagmay nga pakete sa shabu ug drug paraphernalia ang suspek. (GMR) (BANAT NEWS)