Mga durugista giabog ni Garma

CEBU, Philippines — Giabog sa bag-ong babayeng direktor sa Cebu City Police Office ang mga nalambigit sa drugas sa siyudad nga giingong maoy kasagarang hinungdan sa sunod-sunod nga patay.

Sumala pa ni Senior Supt. Royina Garma nga dili na luwas ang Dakbayan sa Sugbo alang sa mga durugista sanglit mas gihingusgan nila ang pagpakigbatok niini.

"Cebu is not safe for drug pushers, not safe for people na nasa listahan sa drugs. Yun yung sinasabi nating Cebu is not safe. You leave the city if you want to live in peace," bahad ni Garma sa mga durugista.

Matud ni Garma nga ang gipamatay posibleng resulta kini sa nagkagubot na nga grupo sa mga durugista tungod sa mas gipahugtang kampanya sa kapolisan.

"Yung complexity ng drug trading di mo kaibigan lahat, so better stop," si Garma niingon.

Usa sa mga operasyon sa kapolisan nikalas sa usa ka 4-anyos nga bata sa Bato, Ermita kinsa giingong napagan sa pagpabuto sa armas.

Makigtagbo si Garma sa mga opisyal sa Barangay Ermita nunot sab sa iyang kasagmuyo sa mga residente nga daw sa nilaban sa mga durugista.

Gipasalig ni Garma nga dili siya “bias” kun molutaw gyud sa ilang imbestigasyon nga adunay sayop ang iyang polis ug giingong abli sab siya kun adunay laing ahensya nga moimbestigar sa maong hitabo.

Butyag ni Garma nga gipaubos og debriefing ang mga operatiba ilabi na kadtong nidala sa bata paingon sa tambalanan sanglit na-depressed sab kini sa nahitabong collateral damage ilabi na nga humok ang iyang kasing-kasing ngadto sa mga bata. (GMR) (BANAT NEWS)