Unang gabii 5 dayon ka motor na-impound
CEBU, Philippines — Naka-impound og lima ka motorsiklo ang mga sakop sa Cebu City Transportation Office (CCTO) nunot sa pagpatuman sa no counter-flow sa may F. Llamas St. niadtong Martes sa gabii.
“Sigun sa atong nakita ang ilang rason gyud kay nagdali sila, then wa sad sila’y mga disiplina, so mao na ato gyud patagmon,” matud sa operations chief sa CCTO nga si Francisco “Isko” Ouano.
Ang mga gi-impound nga motorsiklo gidala sa impounding area sa may Big Foot Studio sa South Road Properties sulod sa 60 ka adlaw ug multa nga P500.
Niadtong Lunes si Mayor Tomas Osmeña nihatag og direktiba sa CCTO sa pagpatuman sa executive order aron makatabang pagpaluag sa grabeng trapik gumikan sa padayon nga konstraksiyon sa underpass project sa maong lugar.
Nagtuo ang mayor nga ang mga sakyanan nga kusog mo-counter flow ang nakadugang sa kahuot sa dagan sa trapiko.
Gawas sa F. Llamas Street, ang anti-counter flowing policy gipatuman sab sa N. Bacalso Avenue, Tagunol Street, Caimito Street, E. Sabellano Street, Ganciang Street ug uban pa. (GMR) (BANAT NEWS)
- Latest
