‘No counter-flow’ sa alternate route gipatuman

CEBU, Philippines — Duna nay lakang nga gihimo ang kagamhanan sa Siyudad sa Sugbo aron pagtubag sa problema sa trapiko ilabi na sa habagatang bahin.

Usa niini ang epektibong gipatuman sa Cebu City Transportation Office ang no counter- flow policy sa mga alternate route.

Kini naumol human si Mayor Tomas Osmeña nihatag og direktiba kanila sa pagpatuman sa maong polisiya nga makatabang sa pagpaluag sa grabeng trapik gumikan sa giugmad nga underpass project sa may Natalio Bacalso Avenue ug F. Llamas Street.

Pahimangno sa mayor nga dili magpakilooy sa iyang buhatan kadtong makalapas sa polisiya ug ipatuman gyud ang 60 ka adlaw nga pag-impound sa sakyanan kung mapirmahan na ang laing executive order.

Gidili ang mga sakyanan nga mo-counter-flow sa mga dalan sama sa F. Llamas Street, E. Sabellano Street, Ganciang Street, Tagunol Street ug uban pa.

Ang naaberiya nga mga sakyanan ang laing hinungdan sa trapik maong nagplano ang mayor nga moumol og team pinaagi sa pangulo sa Cebu City Office for Substance Abuse Prevention nga si  Garry Lao nga mokuha og mga tanod o kaha volunteers nga maoy motulod sa mga sakyanan nga maaberiya.

Kun dili mosalir ang maong plano, si Osmeña niasoy nga hayan i-ban ang mga pribadong sakyanan sa dapit sulod sa usa ka oras sa buntag ingon man sa hapon.

Ang operations chief sa CCTO, Francisco “Isko” Ouano, niasoy nga pwede ra buhaton ang pag-ban sa mga pribadong sakyanan sanglit ang gihuna-huna sa mayor mao ang mga tinun-an ug mga trabahante hinoon ila pa kining tun-an. Giawhag sab niya ang mga tag-iya sa mga sakyanan nga maaberiya nga dili matag-an ang panghitabo apan unta maningkamot sab sila nga makuha aron dili makadugang sa kahuot sa dagan sa trapiko. (GMR) (BANAT NEWS)