Langyaw’ng hubog nanagmal og babaye

CEBU, Philippines — Hubog nga Canadian national gidakop sa kapolisan human kini manukmag og babaye didto sa gawas sa usa ka mall sa Barangay Hipodromo, Dakbayan sa Sugbo kaniadtong Domingo sa buntag.

Si Benjamin Besaw Michael, 30, nag-estar sa usa ka hotel sa dalan Echavez sa Barangay Lorega-San Miguel ning dakbayan. Gitumbok ang langyaw nga midagmal kang Janet Vino, 26, ug tinun-an sa kolehiyo nga taga Lahug.

Matud pa nga samtang naghunong ang gimanehong sakyanan ni Vino paingon   sa parking area sa mall, gisumbag sa langyaw ang likod nga bahin sa iyang sakyanan, ug dayon ang atubangan niini.

Dihang migawas si Vino ug nagpakisayod, giingnan ra siya sa langyaw nga “All Cebuanas are prostitutes. What do you want? How much?” dayon gisumbag ug gisikaran pa si Vino sa tiyan.

Pagkahuman, ang langyaw nidagan palayo apan gigukod siya ni Vino sakay sa usa ka taxi. Pagkamatikud sa langyaw nga sakay sa taxi ang babaye, gisulod niini ang taxi ug gisumbag na pud siya.

Ang drayber sa taxi misuway pagtabang sa iyang pasahero, apan nakulatahan sab sa langyaw, sa wala pa kini masikop. (BANAT NEWS)