Tulisan naratol sa checkpoint nadasmag

CEBU, Philippines — Nadakpan ang duha ka tulisan human sila nadasmag sa railings sa Mananga 1, Tabunok, Dakbayan sa Talisay niadtong Sabado sa hapon.

Ang mga dinakpan nailhan nga sila si Emerson Villafuerte, 47, taga Sitio Sangi, Calajoan, Minglanilla ug si Nicole Salaza, 39, taga Pungsod, Calajoan.

Sila si Insp. Rolando Logroño ug kaubanan nagpahigayon og checkpoint sa lugar.

Ang mga tulisan nga nagpadulong sakay sa motorsiklo ang giingong nakabantay ug naratol hangtud sila nadasmag sa railings hinungdan nga dali lang sila nga nasikop. Nakuha gikan kang Villafuerte ang .22 nga revolver nga walay dokumento samtang 10 ka pulgadang kutsilyo gikan ni Salaza.

Nakuha sab gikan kanila ang mga senina, pitaka ug uban pang mga butang.

Si Supt. Marlu Conag, hepe sa kapolisan sa siyudad, nibutyag nga notado na ang duha ka dinakpan nga maoy responsable sa pipila ka tulis nga nahitabo sa lugar. -/GMR (BANAT NEWS)