‘NPA’ gidakop sa Kasambagan
CEBU, Philippines – Nadakpan sa kapolisan sayo kagahapon sa buntag ang usa ka giingong sakop sa New People’s Army (NPA) didto sa Barangay Kasambagan, Dakbayan sa Sugbo.
Si Edgardo Sacamay, 63-anyos na ang pangedaron, nahibaw-an sa kapolisan nga miuli sa iyang panimalay sa maong dapit hinungdan nga gidakop siya sa mga sakop sa Cebu Provincial Intelligence Branch.
Ang pagdakop ni Sacamay gibase sa warrant of arrest nga giisyu ni Regional Trial Court (RTC) Branch 29 Judge Hermes Montero sa Toledo City tungod sa kasong pagpatay.
Sumala pa ni Senior Inspector Alejandro Batobalonos nga sakop si Sacamay sa NPA ug gani aduna pa kini mga pending nga kasong pagpatay sa Criminal Investigation and Detection Group.
Apan ang dinakpan kusganong nanghimakak ug nangangkon nga supporter siya ni Presidente Rodrigo Duterte. Matud ni Sacamay nga may release order siya gikan sa korte sa mga kaso nga gipasaka batok kaniya kaniadto.
“Wala man gani ko nisukol adtong daghan kaayo ko og kaso, kini pa ba?,” matud ni Sacamay diha nga gihinabi sa mga reporters.
Matud ni Sacamay nga boluntaryo ra gani siyang miuban sa mga polis nga miadto sa iyang panimalay. (/RUB)(BANAT NEWS)
- Latest
