Hepe sa polis gi-relieve

CEBU, Philippines – Polis nga nanagmal og babaye nga nangluwa, gi-relieve.

Lima ka polis nga nadestino sa Abellana Police Station ang giparelibohan sa katungdanan ug imbestigahon kay matud pa midagmal og babayeng may kakulian sa pangisip.

Si Cebu City Police Director Royina Garma mao mismo ang mimando sa pagparelibo human naabti nga gidapatan sa usa sa maong mga polis ang usa ka babaye nga adunay kakulian sa pangisip. Si Garma miinspeksyon sa mga estasyonan sa kapolisan niadtong Huwebes sa gabii ug naabtan ang maong talan-awon.

Ang hepe sa Abellana Police Station nga si Chief Inspector Maria Theresa Macatangay nagkanayon nga niadtong Huwebes sa gabii, adunay nadakpan ang iyang polis nga usa ka babayeng may kakulian sa pangisip.

Samtang anaa sa ilang kustodiya ug gikahinabi sa polis ang babaye, matud pa nga giluwaan sa babaye ang nawong sa polis hinungdan nga kini nadapatan.

Ang babaye nidagan paingon sa gawas sa opisina ug natukma nga naabtan kini ni Garma. Giapil pagparelibo ang laing upat ka polis nga diha sab sa lawak niapil sa pagsukitsukit sa babaye.

Samtang magpadayon pa ang imbestigasyon sa ilang kaso, ang lima ka polis gitahasan ni Garma nga magbantay sa dalan Gorordo, duol sa Camp Sotero Cabahug.

“Lahat ng mahuhuli ko, mag-foot patrol,” matud ni Garma.

Samtang, giparelibohan sab ni Garma ang hepe sa Pari-an Police Station nga si Senior Inspector Caesar Acompañado kay nangangkon nga may gi-detail nga polis sa dalan Colon apan wala kini makit-i atol sa pag-inspeksyon ni Garma.

Nasuko si Garma kang Acompañado kay wala siya makakita og polis sa dalan Colon. Matud ni Garma nga 30 minutos siyang nisuroy sa dalan Colon apan wala gyud siya’y nakit-an nga polis nga nag-foot patrol sa maong higayon.

Misamot ang kasuko ni Garma dihang wala niya maabti sa police station ang hepe nga si Acompañado. Matud ni Acompañado nga ni-duty siya ug gani naka-uniporme pa, apan nagkabaiwas lang sila ni Garma dihang milakaw usa siya aron pagkuha sa iyang sakyanan.

Gipasidan-an ni Garma ang mga polis nga magmatngon kay mohimo siya kanunay og inspection sa mga police station, ug sutaon kon may foot patrol ba sila nga gipahigayon ingon man ang checkpoint.

Kadtong masakpan nga wala motuman sa kamandoan, parelibohan ug imbestigahon.

Gipuli sa pwesto ni Acompañado mao si Chief Inspector Kenneth Paul Albotra nga nadestino na kaniadto sa Parian Police Station.

Awhag ni Garma sa publiko nga isumbong kaniya kon makabantay sila og mga polis nga nagpabaya sa ilang katungdanan. Gusto ni Garma nga ang mga polis anha mag-standby gawas sa ilang police station kon walay patrolya. (/RUB)(BANAT NEWS)