Trapik masinati sa Carcar

CEBU, Philippines – Nipahibawo ang Kapitolyo sa mga sumasakay nga mopadulong sa habagatang bahin sa Lalawigan sa Sugbo nga gisugdan na ang pagsemento sa dalan sa Dakbayan sa Carcar nga posibleng moresulta sa grabeng kahuot sa trapiko.

Matud ni Jonathan “Joy” Tumulak, focal person on traffic management, nga siya gipahibawo sa Department of Public Works and Highways sa pagsugod sa trabaho sa highway sa Barangay Perrelos.

Tungod kay walay diversion road sa highway, ang mga gagmay nga sakyanan giawhag nga adto moagi sa alternatibong dalan sa maong barangay.

“Atong awhag sa atong mga motorist from Cebu City going to South, katong mga light vehicles adto sila moagi sa eskina sakop sa Barangay Perrelos sa Sitio Katugasan, kanang intersection sa Sitio Katugasan mo-right turn sila mo straight sila hangtud moabot sila sa Barangay Kan-asuhan molapos sa Barangay Liburon ug gawas sa Gaisano Carcar," matud ni Tumulak.

Apan tungod sa kagamay sa dalan, ang mga dagkung truck ug bus, mapugos nga moagi sa main highway diin gipaabot nga maghuot sanglit magpuli-puli man pag-agi.

Awhag sab sa kagamhanan sa dakbayan ngadto sa DPWH nga kun mahimo trabahoon ang pagkonkreto sa dalan 24-oras aron madali ang paghuman niini. (/GMR)(BANAT NEWS)