Fun run kontra drugas himuon
CEBU, Philippines – Nakig-alayon ang Cebu City Office for Substance Abuse Prevention (COSAP) sa mga bag-ong napiling mga Sangguniang Kabataan nga mopahigayon og fun run isip kabahin sa ilang kampanya batok sa paggamit sa ginadiling drugas.
Ang mga youth leaders gikan sa 80 ka barangay sa siyudad nga pangulohan ni Sangguniang Kabataan President Jessica Resch moapil sa kalihukan sa COSAP nga ‘Dagan Kontra Droga’ nga mahitabo karong Hulyo 22, 2018 adlaw’ng Domingo.
Magsugod ang kalihukan gikan sa Cebu City Hall ug adto kini mahuman sa Cebu City Sports Center.
“Ang epekto niini nga atong mapahibawo nga atong mga kabatan-onan kinahanglan ma-aware sila any kind of modules or any kind of strategy ug atong mapaabot ang mensahe mahitungod niining kontra nato sa drugas,” asoy sa pangulo sa COSAP Garry Lao.
Giimbitar sab nila sa Philippine National Police, Department of Interior and Local Government ug Philippine Drug Enforcement Agency nga moapil sa kalihukan.
Si Lao maoy co-chairperson sa Cebu City Anti-Drug Abuse Council diin ang PNP ug PDEA miyembro niini. (/IBM)(BANAT NEWS)
- Latest