Labella modagan gyud pagkamayor
CEBU, Philippines — Opisyal nang mideklarar si Bise Mayor Edgardo Labella sa iyang intensiyon nga modagan pagkamayor sa sunod tuig nga eleksyon.
Tungod niini, adunay posibilidad nga tulo ka kandidato ang molansar pagkamayor tungod kay si kasamtangang mayor Tomas Osmeña modagan sab ug si kanhi mayor Michael Rama.
Apan, si Labella ug Rama parehong naghinaot nga usa lang nilang duha ang modagan pagkamayor ug mokontra ni Osmeña.
Si Labella miingon nga aduna na siyay igong kasinatian isip konsehal, bise mayor, prosecutor, ug Ombudsman director nga makatabang kon siya palaron.
“If I win, I would endeavor to have a healing and conciliatory mayorship for the best interest of the city. But I would be uncompromising and unbending when it comes to graft and corrupt practices among employees. I will pursue a no-nonsense fight against illegal drugs,” matud ni Labella.
Sa iyang bahin, si Rama gusto gyung atbangan og balik si Osmeña nga nakaparot kaniya niadtong 2016 elections ug gusto niyang kuhaon og balik si Labella isip bise mayor gihapon.
Sigon ni Rama nga ang mga kandidato sa sunod eleksyon mosumiter sa ilang Certificate of Candidacy karong Oktubre.
“Let’s cross the bridge when we get there,” matud ni Rama.
Nagtuo si Rama nga magkabuwag gyud ang Partido Demokratiko Pilipino–Lakas ng Bayan ug ang Barug Team Rama kon way mohatag og dalan sa usa’g usa. Si Labella mao ang party chairman sa PDP-Laban dinhi sa Siyudad sa Sugbo.
Si Osmeña, sa iyang bahin, miingon nga mas maayong magpares gihapon silang Labella ug Rama kay matud pa niya “together, nothing happened” nga pinabale sa motto sa Team Rama nga “Together we can make things happen.” (/IBM)(BANATNEWS)
- Latest
