Babaye milayat sa bridge

CEBU, Philippines — Patay ang usa ka babaye nga milayat sa Mandaue- Mactan  Bridge sa  habig sa Barangay Pusok, Dakbayan sa Lapu-Lapu ala 1 pasado ang takna kagahapon sa kaadlawon.

Si Senior Police Officer 2 Joseph  Andrin sa Presinto 3 sa Lapu-Lapu City Police Office (LLCPO) miila sa maong babaye nga mao si Dailyn Ebao, 19 , ug  giingong nagtrabaho nga Guest Relation Officer (GRO) sa More Beer House  sa Barangay Pajo sa maong dakbayan.

Matud pa ni SPO2 Andrin nga usa ka concerned citizen ang nagpahibalo sa ilang buhatan kalabot sa usa ka babaye nga giingong milayat sa nahisgotang taytayan.

Matud niya ang mga sakop sa Emergency Rescue Unit Foundation (ERUF) maoy dali nga nitabang sa maong babaye apan patay gayod kini. Sa gihimo nilang imbestigasyon ilang nasuta nga ang maong babaye pasahero sa NCards Taxi nga nagdala sa plate number nga GXX 141 gikan sa Dakbayan sa Lapu-Lapu ug paingon kini sa dakbayan sa Mandaue.

Si  Andrin miingon nga dihang nahidangat na ang taxi sa tungatunga sa taytayan gipahunong sa babaye ang drayber sa taxi ug migawas ang babaye ug milayat sa taytayan. Sa viral video  sa Facebook account sa usa ka Eller Jeff Escarda  usa ka lalaking nagsuot og pula nga polo shirt nga nagkupot og cellphone ang miangkong iyang pasahero ang maong babaye.

Matud niya misakay ang babaye gikan sa usa ka bar ug nagpahatud sa Mandaue City, apan samtang nagdagan diha sa taytayan mipahunong kini sa taksi kay dunay pikapon.

Sumala pa sa drayber diha sa video nga iyang giingnan ang babaye nga dili pwedeng manaog sa bridge apan namugos gyud ang babaye ug  migawas gyud kini  sa taksi.

“Gidiretso niya’g abli, sige siya og text text sa cellphone ba. Gidagan nako iyang giitsa sa ako iyang cellphone,”matud pa sa maong drayber ug miingon nga milayat dayon ang maong babaye padung sa dagat.

Wala pa makuha sa kapolisan ang pangalan sa taxi driver atol ning pagkutlo sa balita nga gusto unta nilang makuhaan og dugang impormasyon.

Wa pa usab matino sa kapolisan kon unsay hinungdan kon nganong milayat sa dagat ang maong babaye. (/IBM)(BANATNEWS)