Pamilya sa retired polis nanawagan og hustisya

CEBU, Philippines – Ang pamilya sa retiradong polis nga si Senior Police Officer 2 Ranilo Valiente kinsa gipusil patay niadtong Domingo sa gabii sa Barangay Cubacub, Dakbayan sa Mandaue nanawagan nga mahatagan og hustisya ang kamatayon sa biktima.

Si Valiente gikatakdang ilubong karong Hulyo 7.

Matud ni Martha Valiente nga human niretiro ang iyang bana niadtong buwan sa Abril sa nilabay’ng tuig naghabal-habal driver kini ug aduna usab silay tubig machine nga hulog-hulog og piso ug nag-sideline usab ang iyang bana isip basketball coach sa ilang lugar. Si Martha nagkanayon nga ang iyang bana maoy presidente sa organisasyon sa mga habal-habal driver sa Cubacub sulod sa usa ka tuig ug wala siyay nasayran nga nakaaway o nakalalis sa iyang bana.

Si Martha nagkanayon nga duna pa silay gagmay nga anak ug nanghinaut nga makonsensiya ang kriminal sa iyang bana aron mahatagan og hustisya ang kamatayon niini. (/BDB)(BANAT NEWS)