Konsehal sa Lapu-Lapu namatay

CEBU, Philippines – Gideklarar nga dead on arrival sa Mactan Doctor’s Hospital si Konsehal Roque Wagwag sa Dakbayan sa Lapu-Lapu kinsa nagpangedaron og 45-anyos.

Si Konsehal Harry “Don” Radaza nga kaubang konsehal maoy nikompirmar nga si Wagwag namatay alas 11:35 kagahapon sa buntag dihang naglisud kini sa pagginhawa tungod sa atake sa kasingkasing hinungdan nga dali kining gidala sa tambalanan sa iyang pamilya.

Si Wagwag lumad nga taga Barangay Baring sa Isla sa Olango sa maong dakbayan ang nahimong konsehal sa panahon pa sa administrasyon ni anhing mayor Ernest Weigel sa tuig 1990s.

Nagpadayon kini sa iyang serbisyo isip konsehal hangtud sa administrasyon ni kanhi mayor Arturo “Boy” Radaza ug nihunong dihang natapos ang iyang tulo ka termino. Sa iyang pagbalik sa konseho ubos na sa administrasyon ni Mayor Paz Radaza ug dungan unta sila nga motapos sa ilang katapusang termino sunod tuig.

Dihang namatay ang usa sa ilang kauban nga si anhing konsehal Damian Gomez niadtong 2017, gipangamahanan pa ni Wagwag ang resolusyon nga nagpadayag og paghandum sa mga nahimo sa namatay nilang kauban uban usab sa pagpadayag sa ilang simpatiya ngadto sa mga sakop sa pamilya nga giaprobahan sa tanang sakop sa konseho niadtong higayuna. (Romeo T. Limpangog/GMR)

Buhis importante kang Tom kay sa permit

Nagkanayon si Cebu City Mayor Tomas Osmeña nga bilyones ka pesos ang mawala sa siyudad gumikan sa magpapatigayon nga dili mobayad og buhis.

Nagplano ang mayor nga moumol og grupo nga maoy mogukod sa dili mominus 10,000 ka business establishments nga wala’y business permit ug wala magbayad og buhis nga kalapasan sa Omnibus Tax Ordinance sa siyudad.

Apan giklaro ni Osmeña nga dili siya interesado kung ang usa ka establisemento wala’y business permit basta mobayad lang sila sa ilang buhis sa siyudad.

Matud sa mayor nga ang mga negosyante mokuha lang og certificate sa City Treasurer’s Office nga magpamatuod nga nibayad og buhis.

“What’s the difference, because business permits are pain in the neck. You know, you get the fire department, the GSIS PhilHealth, SSS. I don’t care about that I just care on paying taxes as long as you pay taxes, I don’t care if you get police clearance. I don’t care whether your business is illegal just pay your taxes,” sigun ni Osmeña.

Dili palabyon ni Osmeña ang mga ilegal nga binuhatan sama sa dili pagbayad og buhis ug gani kini nibahad nga ang siyudad seryuso sa paggukod sa mga tax evaders. Ang pangulo sa Prevention, Restoration, Order, Beautification and Enhancement (PROBE) nga si Raquel Arce ang itudlo ni Osmeña nga mangulo sa grupo nga iyang umulon. Sigun sa mayor nga kadtong mga business establishments nga masirad-an mangita gyud og paagi aron makaabli og balik ilabi na kun makabayad na og buhis apan siya niasoy nga ila ra kining lingkuran ug dili tugutan nga makaabli og usab sulod sa duha ka tuig. (/GMR)(BANAT NEWS)