Adbokasiya sa LGBT ang paglikay sa AIDS

CEBU, Philippines – Ang pagsaka karon sa gidaghanon sa mga gitakboyan og sakit nga HIV-AIDS nagumikan kay hingpit na nga nahatagan og tukmang kasayuran ang katawhan nga dili mauwaw nga mopahibalo sa ilang sakit. 

Kini ang gipadayag ni Mandaue City Treasurer Regal Oliva nga maoy nangulo sa pagpasiugda sa paghimo’g parada sa mga sakop sa LGBT sa kadalanan sa Mandaue City karong Domingo isip pagsaulog sa Pride March ning tuiga.

Matud ni Oliva nga silang mga Lesbian, Gay, Bisexual ug  Transgender (LGBT) sa Dakbayan sa Mandaue, adbokasiya  nila ang paglikay sa HIV-AIDS ug palapdan nila ang pagsabwag og kasayuran ngadto sa katawhan.

Si Oliva miingon nga makapaalarma na gyud karon dinhi sa Sugbo ang pagkuyanap sa sakit nga HIV-AIDS mao nga pasiugdahan nila ang mga awareness program alang sa paglikay sa maong sakit.

Gitataw ni Oliva nga maisip na nga epidemiya kon anaa na sa singko porsiyento sa gidaghanon sa populasyon ang natala nga gitakboyan sa sakit nga HIV.

Nagtuo hinuon si Oliva nga ang padayon nga paghatag og tukmang kasayuran labot sa AIDS-HIV maoy nakapadaghan sa statistics kay ang mga tawo dili na mahadlok nga moreport sa mga health officials.

Sa nasayran nga ang Pilipinas maoy adunay labing taas og HIV infection rate sa Asia Pacific, kay matag adlaw gibanabana nga dunay 31 nga matakboyan ug bag-ong kaso sa HIV. (/RUB)(BANAT NEWS)