Tabang alang sa mga senior citizen sa Talisay gipadak-an
CEBU, Philippines – Ang matag usa sa mga senior citizens sa Dakbayan sa Talisay nga accredited sa ilang Office of Senior Citizens Affairs (OSCA) makadawat na og P4 mil nga cash assistance para karong tuiga.
Kini human si Mayor Eduardo Gullas nipausbaw sa kantidad gikan sa usa ka libo ka pesos lang unta nila nga madawat matag tuig. Apan ang paghatag himoon kada tulo ka buwan sa tag P1,000.
Matud ni Mayor Gullas nga pinangga niya ang mga senior citizen tungod kay dako sila og natampo alang sa kalamboan sa siyudad hangtud nga niabot sila sa ilang pangedaron karon.
Misaad si Gullas nga dili siya mohunong sa pagpangita og paagi aron makahimo og mga programa alang sa kaayohan sa mga tiguwang.
Si Felipa Solana, pangulo sa City Social Welfare and Development (CSWD) sa Talisay City, nagkanayon nga ang P4 mil nga cash assistance dako na kaayo og matabang sa mga senior citizen kay daghan sa mga tiguwang ang adunay mga maintenance sa tambal.
Nasayran nga niabot na sa 12 mil ka senior citizen nga nakaparehistro sa Office of the Senior Citizen Affairs (OSCA) sa Dakbayan sa Talisay.
Nahibaw-an sab nga adunay pipila ka senior citizen nga namuyo sa Talisay apan sa siyudad sa Sugbo nagparehistro tungod kay mas dako ang ilang madawat matag tuig. (/RUB)(BANAT NEWS)
- Latest
