Duha ka kagawad ug naparot nga kapitan gisuspenso

CEBU, Philippines – Naparot nga barangay kapitan sa Barangay Labogon, Dakbayan sa Mandaue sa miaging Mayo 14 nga Barangay ug Sangguniang Kabataan  election kauban sa nasublian sa katungdanan nga duha ka barangay konsehal  ang gipaubos  og preventive suspension hangtod sa Hunyo 30.

Sa mao untang petsa moasumir sa katungdanan ang mga bag-ong nakadaog sa nakalabay nga piniliay.

Ang gisuspenso mao si Labogon Kapitan Renato Suson, Barangay Kagawad Alfredo Estrada ug Kagawad Bewilson Bodo Jr. nga parehong nakadaog sa nakalabay nga piniliay gawas ni Suson.

Si Mandaue City Legal  Officer  Atty. James  Sayson nga maoy mipatuman sa suspension order batok kanila miingon nga sumpay kini sa nahauna nga kamandoan sa City Hall pagsuspenso kang Suson nga molungtad  unta og  60 ka adlaw. Naputol kini niadtong Mayo 14 tungod sa barangay election.

Ang tulo giingong nakalapas sa  Anti-Graft and Corrupt Practices Act base sa gisang-at nga reklamo nilang kanhi barangay kagawad Amado Manatad,  Corazon Dajao-Tumulak, Marvin Soco ug Baby Besabella Gutierez .

Gipasanginlan si Suson nga nipalit og 65  ka sakong semento, lima ka kubiko bas ug graba ug 1,000  ka mga  hollow blocks gamit ang kwarta sa barangay nga walay resibo ug walay bidding nga nahitabo. Si Sayson gikuyogan sa Department of Interior  and Local Government (DILG) sa Dakbayan sa Mandaue maoy nagdala sa suspension order nga pinirmahan ni Mayor Gabriel Luis Quisumbing.

Apan wala diha ang kapitan ug walay mga kawani sa barangay nga nidawat hinungdan nga gipapilit na lang sa buhatan sa kapitan ang kamandoan. (/IBM)(BANAT NEWS)