57th Charter Day sa Lapu-Lapu City

CEBU, Philippines — Giawhag ni Mayor Paz Radaza ang mga lumolupyo sa Dakbayan sa Lapu-Lapu nga magpadayon sa ilang paghiusa ug pabilin nga magmalig-on aron sa ingon  padayon usab nga maangkon ang kalamboan.

Sa iyang mensahe, gipadayag ni Mayor Radaza ang nasinati nilang mga kakulian taliwala sa ilang pagpaningkamot nga ikahatag ang maayong mga serbisyo alang sa katawhan.

Nagkalainlain ang mga kakulian nga ilang nasugatan, sama sa nahitabong sunog sa Barangay Pusok, Pajo ug uban pa nga mga barangay.

Matud ni Radaza nga sa maong katalagman nga ilang nasinati, subo kaayong palandungon kay daghan man ang nawad-an sa ilang pinuy-anan ug kabtangan, samtang ang uban nawad-an og sakop sa pamilya nga nakalas.

Apan gipasigarbo sa mayor ang mga naangkong kalamboan sa dakbayan, ug nag-una niini ang bag-o lang nga gisubhang world-class Terminal 2 sa Mactan Cebu International Airport.

Gitataw ni Radaza nga ang pagbukas sa world class nga international airport terminal 2 maoy naghatag og dugang kahigayonan nga makabig sa pagbisita dinhi ang daghan pa nga mga langyaw’ng turista.

Apan nunot niining mga kaayohan nga naangkon sa dakbayan sa Lapu-Lapu, matud ni Radaza nga aduna lang gihapo’y mga tawo nga mosaway sa administrasyon. Samtang giangkon ni Radaza nga nahulga gyud ang dakbayan sa Lapu-Lapu sa findings sa Department of Environment and Natural Resources - Environmental Management Bureau (DENR-EMB) nga nagbutyag sa kagawon na nga kadagatan sa ilang siyudad. Matud pa nga kontaminado na sa kagaw nga E-coli ang kadagatan hinungdan nga gipangguba na pagsugod ang mga illegal structures nga gitukod daplin sa kadagatan, apil ang mga boarding house ug mga piggery nga maoy nakatampo sa kahugaw sa dagat. (BANAT NEWS)