Suspetsadong rapist nadakpan na sa kapolisan
CEBU, Philippines – Nasikop sa kapolisan kaniadtong Biyernes ang tawo nga gipasakaan og kasong pagpanglugos og babaye didto sa Barangay Muabog, Lungsod sa Tabogon.
Walay piyansa nga girekomendar alang sa temporaryong kagawasan sa suspek nga si Elpidio Parawan, hingkud ang panuigon, kinsa gidakop human nga miuli kini sa ilang panimalay.
Si SPO2 Alman Acabal ug mga kauban sa Tabogon Police Station armado og warrant of arrest nga giisyu ni RTC Branch-79 Judge Jineffer B. Singco nga nagbase sa Dakbayan sa Bogo.
Dugang pa ni SPO2 Acabal nga niadto pang miaging tuig nga gipasaka ang kasong pagpanglugos batok ni Parawan apan kaniadto lang Mayo 21 nga ang korte miisyu og warrant of arrest batok sa suspek.
Samtang laing gidakop sa kapolisan base sa warrant of arrest mao si Fedelito Casiban, 39, taga Sitio Maharlika, Barangay Tipolo, Dakbayan sa Mandaue.
Si Casiban nag-atubang og kaso paglapas sa Republic Act 9165, o Comprehensive Dangerous Drugs Act of 2002. Matud ni SPO4 Enrico Iway sa Presinto 2 sa Mandaue City Police Office (MCPO) nga ang dinakpan itugyan nila sa Mandaue City Jail ugmang adlawa. (/RUB)(BANAT NEWS)
- Latest
