Mga barangay gihangyo manglimpyo sa mga kanal
CEBU, Philippines – Mihangyo ang Department of Engineering and Public Works (DEPW) sa mga residente ug sa mga barangay sa Siyudad sa Sugbo nga tabangan sila pagmentinar sa mga sapa ug kanal ilabi nang gasugod na ang ting-uwan.
Si Assistant City Engineer Nilo Igot miingon nga duna nay gipang-hire nga job orders nga manglimpyo sa mga sapa ug kanal.
Gani, nakakuha og toneladang mga plastic nga basura sa nakalabay nga operasyon.
“Ang importante sad nga ang mga barangay nga naay sapa like Tejero nga motabang og bantay ug mag-educational campaign ug information campaign sa ilang residente nga ang plastic dili ilabay sa sapa,” matud niya.
Sa miaging semana, ang Philippine Atmospheric, Geophysical, and Astronomical Services Administration (PAGASA) mideklarar nga nagsugod na ang ting-uwan.
Magdala kini og baha ug pagdahili sa yuta sa bisag asang lugar sa nasud.
Matud ni Igot nga ang pagpataka og labay sa basura ilabi na ang mga plastic ang hinungdan sa pagbaha sa siyudad.
Tungod niini, mipadayag siya sa iyang suporta sa plano ni Mayor Tomas Osmeña nga total plastic ban sa siyudad.
Karong tuiga, adunay P3.5 million nga budget alang sa paghabwa sa mga bara sa mga kanal ug P1 million alang sa pagmentenar sa kadalanan.
Matud ni Igot nga nagsige na siya og dawatan og mga hangyo nga ayuhon ang kadalanan ug habwaon ang kanal ug sapa sa ilang lugar. (/IBM)(BANAT NEWS)
- Latest