Sakyanan nagsungag, 10-anyos naangol

CEBU, Philippines – Naangol ang 10-anyos nga babaye human ang jiffy type nga giluwanan niini ang nasungag ngadto sa truck de carga sa dalan  Libjo, Lungsod sa Tabogon alas 6 pasado sa buntag niadtong niaging adlaw.

Si Police Officer 1 Dan Bernard Navarro, field investigator sa traffic section sa Tabogon Police Station, niila sa biktima nga si Lady Lyn Empinado, taga Mabuli sa maong lungsod.

Matud ni Navarro nga sakay ang biktima sa jiffy type nga sakyanan nga gimaneho sa uyoan nga si Algier Lamban.

Giingong ni-overtake sa sakyanan ang motorsiklo nga gimaneho ni Andrew Zafra Culongan, hingkod, taga dalan Katipunan, Labangon, Siyudad sa Sugbo, ug gikasugat niini ang truck nga gimaneho ni Gerome Leyson, hingkod, taga Dakit, Dakbayan sa Bogo.

Si Navarro niingon nga gilikayan sa drayber sa truck ang motorsiklo hinungdan sa pagkabangga niini sa sakyanan ni Lamban nga nakaingon sa pagkaangol sa biktima ug nalandig sa tambalanan. (/GMR)(BANAT NEWS)