Way SOCE dili kalingkod

CEBU, Philippines — Nipahimangno ang Commission on Elections nga dili makalingkod ang mga nidaug sa eleksiyon nga wala kasang-at sa ilang Statement of Contributions and Expenditures (SOCE).

Si Provincial Election Supervisor Lionel Marco Castillano nagkanayon nga naa sa balaud nga tanang nilansar, nidaug man o napilde, kinahanglan nga moduso sa maong dokumento.

Kagahapon ang katapusang adlaw sa pagduso sa SOCE.

Ang wala nakaduso sa SOCE mahimong makabayad og multa sa Department of Finance samtang kadtong kaduha na nga wala makasang-at niini mahimong pasakaan og kaso ug dili na makalansar sa sunod eleksiyon.

Samtang si Kongresista Gerald Anthony “Samsam” Gullas niawhag sa mga nidaug nga opisyal sa barangay atol sa mass oath taking nga magtarung sa pagserbisyo ug paggasto sa pundo sa barangay.

Lakip sa giawhag sa kongresista ang mga opisyal sa Sangguniang Kabataan nga mangita og proyekto nga mahimo nilang hatagan og bili aron kini magmalampuson.

Si Gullas ang nipahural sa mga opisyal sa Barangay ug SK sa unang distrito sa Lalawigan sa Sugbo niadtong Martes atol sa Independence Day.

Mapasigarbuhon si Gullas nga sa 130 ka barangay sa unom ka siyudad ug lungsod sa iyang distrito, 94 porsyento niini ang kaalyado sa ilang Alayon Party.

Sa Dakbayan sa Talisay, tulo lang ang gikan sa 22 ka barangay ang dili niya kaalyado. (Rowena D. Capistrano/GMR)(BANATNEWS)